一家三口遊澳門 Day 2

張床好舒服, 仲以為一覺訓到天光, 點知半夜熱醒左, 張羽絨被太暖喇, 連阿b都焗醒埋, 猛咁young, 未試過咁激動, 好似游水浸親咁, 要散左熱先好番d, 訓到8點阿b又郁, 搞到要起身, 老公訓到唔願起身, 訓到8點半先起身準備落去食早餐

早餐都算多野食, 連雲吞麵都有, 麵包, 奄列同生果都食唔落,

估唔到有macaron, 不過真係好甜, 每個試下味就算

食完返房影下相就check out, 寄存左d行李就行MJ 館, 唔知係咪早得滯, 得幾個人行~

跟住打的上主教山, 好彩無行上山, 條路真係好斜, 十年前同老公拍拖帶我黎, 十年後帶埋阿b黎, 時間過得真係快~~

仲有3 pair 人影婚紗相, 有2 pair人有埋阿姐跟, service 真係好

影完相又行落阿婆井前地

仲有鄭家大屋, 我地都幾好彩, 原來整左8年, 咁啱行過就入去行下, 無詳細咁行,因為趕住2點前行去食粿條

等左十幾分鐘先有位~

粿條即係貴刁, 呢碗係豬肉丸刁, D貴刁好滑, 肉丸都好食, 我地2個人叫左3碗, 加埋杯凍檸茶, 正!

食完行出街口等巴士去路環, 媽閣附近等21a, 點知原來半個鐘先一架車, 好在巴士站有位坐, 等左4-5個字先有車, 到左路環市區, 沿海邊行去聖方濟各堂, 對面就係珠海橫琴, 之前睇學友concert 播個mv 有幕係聖方濟各堂拍, 實景好似無咁靚

影完相出番去巴士站對面間安德魯食葡撻, 杯lemonade幾好飲, 不過葡撻個皮有d硬, 似係翻叮~

食完撻又搭巴士出番新馬路, 去大三巴附近換豬扒包同鳯凰卷

呢杯都唔知係乜野果汁, 飲左2啖無飲喇, 個包都ok, 熱熱地, 係鹹左d

跟住又行上崗頂前地

去祥記食麵, 個麵碗都幾細, 大個我屋企個飯碗少少, 老公話個蝦子撈麵好食過六記, 我都覺得唔腥, 食落有d甘甘地, 阿姐放低完碗麵, 呢2個大陸人指住我碗麵問係乜, 阿姐答得慢d就好惡咁話阿姐, 真係好鬼黑人憎~

呢間野都幾好, 我地去到無卡位, 諗住坐中間d枱, 有個姐姐話驚撞到我, 叫我搭住枱先, 見到有吉卡位又叫我小心d, 慢慢行~

等shuttle bus去碼頭等足3個字, 順便影下酒店門口