casablanca開倉

第一次去casablanca 開倉, 諗住買床單同被俾阿b , 11點幾已經去到, 原來已經好多人, 個場又唔係好大, 排隊俾錢都幾十人, 姆明床單枕單好抵, 都係$80套, 不過無晒被袋, 隔離有一堆智慧被套裝 , 但係無乜款, 所以問下哥哥有無反斗車王, 佢話有, 入倉幫我地攞, 都係$259一套, 原本想買另一款反斗車王, 但係要$339一套, 所以無買到, 90%羽絨被都係$669 , 又係要問staff 入倉攞, 叫老公排住隊先, 諗住搵下單人床單連被袋套裝,  淨係得加菲貓同elle, 但都要差唔多$300套, 之前係工展會買左套elle 都係差唔多價錢, 所以都無買到, 原本想買埋個小童枕俾阿b, 但老公話太高, 有排都用唔到, 又無買到, 仲有d bb床圍, 不過我地有, 唔駛買, 揀完都成身汗, 仲要護住個肚, 排左個幾鐘先俾到錢, 到我地走果陣仲多人, 排隊俾錢排到入口,  買完野飲埋茶先走~

25 wk 私家產檢

尋日去左王醫生度檢查, 醫生話胎盤無上次咁低, 阿b個頭已經向下, 唔怪得呢排成日郁, 跟住又度下大脾骨, 肚圍同頭圍, 今次阿b無翹腳, 仲擘大對脾, 睇得好清楚係男仔, 攞埋materna 同鈣片就走得~

24 wk 第二次廣華產檢

尋日朝早返廣華做第二次產檢, 一入到去發現全場滿座, 多人到要企, 交完覆診紙等左陣就量血壓同驗小便, 但今次無幫我磅重喎, 自己走上去磅下好似無乜點重到, 可能呢排食少左野, 再等多9個字先有得見醫生, 今次係好後生既女醫生, 可能係實習醫生, 入到去上床到聽bb心跳, 俾醫生按下肚就搞掂, 醫生問我上次驗血血色素係幾度, 我話7點幾, 佢話今次好d, 有8點幾,不過都係低, 所以開左d鐵丸俾我, 話驚我生完要輸血, 今次醒左,叫老公落去交葯單先, 自己坐係度等攞覆診紙, 今次都算快, 等左2個字就有覆診紙,落去地下,等一陣就有得攞葯~

美素佳兒產前講座

上星期六去左美素佳兒產前講座,今次講育嬰技巧及懷孕媽媽及寶寶營養須知, 一入場見到有得排隊同牛牛影相,

開頭有營養師講下懷孕期同餵母乳期的營養

懷孕期dos:
豐富DHA食物,例如:深海魚
懷孕頭三個月食多D深綠色的菜吸叫葉酸
每日三杯低/脫脂奶品
食益生纖維等腸道暢通
食紅肉,海參吸收鐵質

懷孕期don't
飲汽水,因為會吸收到咖啡因
過度進補
食高鹽及醃製食物
額外食多d碳水化合物食物
自已買維他命a丸黎食

餵母乳期dos:
每日10-12杯水
食多d優質蛋白
食維他命a及胡蘿蔔素食物
每日三杯低/脫脂奶品
食多d免疫營養素,例如:鋅, 硒 ,核苷酸,益生纖維...

餵母乳期don't:
食大量膠質食物(例如花膠,筋類)
食濃味食物,例如洋蔥,蒜頭,辣野
飲高咖啡因飲品
食韮菜,提子,乳鴿等回奶食物
產後太早節食修身

餵母乳營養所需:
水:約12杯
蛋白質:約豬扒3大件
葉酸:約西蘭花3個
鐵質:約炒牛肉40片
鋅質:約豬扒3大件
硒質:約大豆芽2大碗
鈣質:約牛奶3杯
維他命d:約牛奶3杯
維他命a:約木瓜4杯

中場播下自家農場d片, 又好似幾好,整奶粉既過程都幾清楚, 跟住仲有姑娘講下餵母乳既準備同方法, 我覺得最好係有沖涼示範, 不過包片果度有d疑問, 之前睇媽媽雜誌話包片要遮住臍帶,但姑娘話要係尿片頭反一反,唔好遮住臍帶,咁即係點先啱呢?

臨走前登記左上育嬰班, 填番問卷就有禮物包送番, 有成5包媽咪奶粉, 仲有支花送, 雖然拎到返屋企都謝謝地

預防妊娠紋

16WK 開始晚晚搽BB油, 但第二日通常會又痕又亁, 我個FD SEND左徐淑敏個專欄俾我俾, 佢話搽D小麥胚芽油+甜杏仁油可以預防妊娠紋, 如果已經出左妊娠紋就用甜杏仁油+玫瑰果籽油搽, 佢生左2個都無妊娠紋, 好似試得過喎~

彩豐行無小麥胚芽油, 但我見玫瑰果籽油對妊娠紋都有效,所以買左甜杏仁油+玫瑰果籽油黎搽, 搽左幾日, 比bb油快吸收, 個肚d皮膚仲滑左, 希望keep住搽唔會爆妊娠紋啦~

產前、產後綜合課程-營養課+護協格價

 因為報唔到廣華運動班, 所以報左個產前、產後綜合課程學下點做產前運動, 見未夠鐘上堂就過護協行下, 順便格價, 護協真係唔係好大, 好彩尋日唔係好多人,d bb野都好齊, 有d product 同我樓下葯房差唔多價錢, 所以唔駛係護協買,  行左陣開始多人就走喇~

內         容：

運        
動：產前、產後運動、助產呼吸(即場練習)透過伸展關節及強化肌肉的訓練，

                  

提高生理及心理對生產的預備。

心理適應：嬰兒誕生對夫婦的影響、夫婦如何面對挑戰、嬰兒心理發展。

營       
養：懷孕期之營養食品、哺乳期補身及營養需要、產後修身。

我12月頭先報,諗住無乜人報, 點知有成10pair人上堂, 初頭諗住有d悶, 因為睇左幾本孕婦營養食譜書, 不過營養師份note 都幾詳細, 又講下出街食有乜選擇, 點樣食得健康d, 有營養d, 仲有康鈣c 唔可以預防傷風感冒, 只可以舒緩症狀, 等我仲以為可以防病添~

營養師話有個媽咪俾3個仔女食魚肝油丸, 食到十幾歲, 搞到其中一個要換肝, 因為魚肝油丸好高維他命a, 多左既維他命a 會儲係肝度, 所以搞到肝有事~

又講下餵人奶唔好食辣野,咖哩, 蒜頭同椰菜, 因為會影響人奶既味道, 同埋講下點幫bb 轉奶, bb食d乜野好, break果陣仲有d 麥包,吞拿魚同yogurt食下, 不過我無食

我覺得都幾有用, 始終有個營養師坐係度,有問題可以問下, 無睇書咁悶~

安滿媽媽會小禮物

之前係安滿登記左媽媽會, 尋日收到媽咪奶粉sample , 估唔到仲有莫扎特cd, 阿b又有歌聽喇!

終於收到喇~

終於收到雀巢媽媽會張咭喇, 可以去護協買野, 等我諗下買乜先~

美國雅培媽媽學堂 之 免費產前講座

尋日去左聽雅培講座, 老公唔得閒,所以自己去, 初頭有個中大教授講點培育精靈bb, 叫我地畫一棵平時見到既樹, 一棵心目中既樹, 同埋bb 30年後既樣, 仲要寫埋希望bb係乜野身份同職業, 我想bb第時開心同有正當職業就得, 教授話對bb既期望都會影響到bb, 所以胎教好重要, 仲要聽多d音樂, 同bb傾多d偈, 情緒平和d, 睇多d靚野, 咁先刺激到bb腦部發展,
跟住又sell 下雅培奶粉, 媽咪奶粉買一送一, 仲有部播歌仔既機送, 不過唔啱我,所以無買
跟住到張傑兒科醫生講左bb護理, 佢話bb訓得多會易d甩頭髮, 甩左又未必生得切, 所以3,4個月左右就等佢多d扒係度玩, 訓練下頸力, 同右腦發展
同埋唔好用棉花棒幫bb 整耳屎, 耳屎會自己流出黎, 幫bb整好易整入耳道,
清鼻屎就用盒裝紙巾卷埋幫bb搞,
抹肚臍用凍滾水同火酒都得, 但抺完要印乾,唔係好易發炎
仲有唔好幫bb揭包皮, 好易整親bb, 12歲左右自己會揭起,
濕疹就要多d保濕, 唔好俾bb "r", 唔得就要睇醫生, "r"左好易流血同發炎, 到時要食抗生素
bb通常都係扁平足, 好似baby fat 咁, 遲d就正常番

12點半左右完, 跟住過隔離實習區, 申請做mides, bb care 同disney 會員有得換禮物, 換完禮物睇下點幫bb換片同著衫, BB care 個counter 有Aprica bb車示範, 好似幾好用, 不過bb表姐有車留俾bb, 所以唔駛買, 反而想睇網床, 不過太多人, 睇唔到, disney個counter有得影即影即有, 不過我得一個人所以無排, 出番hall 又有媽咪奶粉試飲, 交埋雅培張問卷同Huggies bb會form 換一袋禮物包, 跟住走得, 個禮物包好鬼重, 諗住行下永安都無心情, 去完安記買野就搭車返屋企  

最鍾意張cd , 可以播俾bb聽, 無留意mides 送個手套仔係粉紅色, 早知換其他色啦~

胎動

第一次feel到阿b係攤係度訓覺果陣, 個肚突然間有野突出黎, 第一個反應係有d驚, 跟住就開心, 唔知係咪我攤係度, 佢唔舒服,所以要伸下腳, 呢排阿b夜晚郁多左,
睇睇下電視就feel到佢郁, 用隻手大力少少按落去, 佢會反彈, 我叫老公放隻手試下, 佢都feel到反彈, 仲話好驚, 哈哈~
不過我想佢郁多d, 等我同佢玩下, 訓覺果陣就唔好喇, 唔知幾時佢識踢我呢?

淘~孕婦褲

之前係呢間野買左牛仔褲, leggings 同返工褲, 都幾好著, 所以買埋運動褲 , 一條厚, 一條薄, 諗住係屋企同落街著都得, 要買多條厚返工褲, 先夠數免郵,  收左貨, 厚款真係幾鬼厚, 10度都唔驚凍親對腳, 等下個月收番淘寶回扣再諗下有乜好買~

淘~孕婦內衣

 依家個肚又開始大, 之前係千色店買左幾個孕婦bra 唔係幾夠用, 每個要百幾蚊,  我見個招牌寫君心, 又係簡體字, 所以係淘寶search 下, 點知真係有, 價錢仲平3分一, 不過d 款麻麻地, 所以搵左第二間買, 我見呢間銷量第一既bra賣左6萬幾個, 評語都幾好, 應該唔差得去邊, 所以訂左6套, 買d 無鋼圈生完都可以用

呢套最平, RMB50

呢套最貴, RMB90

收左貨d質地都幾好, 車工都唔錯, 無刺鼻味, 每個 bra都送延長扣, 早知早d買, 唔駛日日手洗~

回顧

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
8月頭去澳門, 本應period到,但等下等下遲左一個禮拜都無, 再等多一個禮拜就搵醫生驗孕, 專登駛開老公 , 叫佢番屋企先, 點知佢買埋報紙坐係診所等 , 驗完等左陣見醫生, 醫生話"係有左" , 果刻真係唔係好信, 因為d徵狀真係好似 period, 爆瘡, 肚脹, 咁就有左??

到攞醫生信果陣, 個姑娘竟然話呢封係懷孕證明 , 搞到成個診所都聽到, 唉, 無得同老公講添, 我老公無表情, 問佢有乜野感覺就係度傻笑 , 我個fd介紹睇林翠苗, 打電話去book排到10月頭 , 點知8月尾就流血, 雖然流量唔算多, 但到入急症室 check 下穩陣d , 仲諗住急症室有得照超聲波 , 點知醫生話要婦科先有得照, 所以要留院觀察,  搞左一輪上去等見醫生, 有個後生靚仔男醫生睇我, 問我有無流血塊同白色物體, 搞到我有d驚, 我問醫生係咪作小產, 佢話係, 不過好多大肚婆都會有, 跟住男醫生幫我做檢查, check完個胸 就用個鴨咀箝檢查, 搞到我有d痛, 我一痛就周身郁,  醫生同姑娘叫我放鬆d, 我心諗, 有d凍冰冰既野插入黎點放鬆呀?

跟住另外一個女醫生幫我做超聲波檢查, 佢話見到胎囊但未見到心跳, 見我唔係流好多血可以唔駛留院, 即時開心晒, 仲問我要幾日sick leave , 我話一日得喇, 即刻打俾老公

放假順便攞埋醫生信去廣華登記, 有個中年西裝友同個女人黎登記, 姐姐問佢住邊, 佢話"新界羅, 唔登記得架咩?" 姐姐話分左區, 佢仲話佢朋友住新界都係廣華生, 點解佢唔得, 仲問幾時分區, 又問人攞威爾斯電話, 攞完打去無人聽又問姐姐點算, 真係好鬼煩, 好心佢黎登記前 search 資料下先啦~

雖然check完無乜野, 但都想睇多次私家, 好彩林翠苗有位, 可以睇左先, 林醫生講野都幾快, 我有幾次都聽唔清楚佢講乜, 一照超聲波, 胎囊多左一點眨下眨下, 醫生話佢有心跳喇! 仲開左bb既心跳聲俾我聽, 撲撲,撲撲, bb 有6w5d大, 醫生話90%穩定, 當堂安心晒......


因為林醫生太難book 喇, 所以轉左王學勤醫生, d人話易book 又平, 10wk第一次睇王醫生, 佢知我作小產, 又幫我用鴨咀箝檢查, 我又係度郁, 醫生話個箝係死物, 如果我郁得多會仲唔舒服 , 所以我係咁深呼吸, 好彩醫生話無流血,  照超聲波果陣見到阿b,已經有手腳, 仲係度郁身郁細, 扮打拳, 醫生話佢好活躍, 我見到佢都好開心, 診金係林醫生既差唔多一半, 真係幾抵, 又易book, 係d儀器舊d

陀左2個幾月個肚成日扯住痛, 但無流血, 所以無睇醫生, 個胃又頂住頂住, 要慢慢食, 仲好易攰, 坐係度睇電視都訓著, 行一個鐘已經好攰, 老公仲叫我行山, 我都費時踩佢

10月2日陀左阿b 3個月, 之前果晚約左fd打邊壚 , 原來佢都有左2個月, 仲係twins, 真係好喇~

終於可以公告天下, 老公同屋企人講竟然無人信佢講野, 同我屋企人講, 我細路問改左名未, 我話仔定女都未知,點改呀?

10月7日去左廣華做oscar, 等左幾個字就見得姑娘, 點知阿b成個倒轉左, 要出去行下, 等多半個鐘先入番去照, 阿b翹實對腳, 得閒摸下面,  好快姑娘 check完話低風險

11月頭又睇王醫生, 今次阿b無乜點郁, 原本應該16wk大, check 完應該係17wk大, 阿b又幾吸收喎~

21 wk 照結構

今日下晝去覃伯英醫生度照結構超聲波, 跟住又有pair大陸人夫婦黎睇, 係我地隔離係咁講鄉下話, 好鬼嘈. 等左幾個字就見醫生, 個mon都幾大, 老公坐係我隔離, 一開始照個腦同五官, 跟住照個心肺,腎 手手腳腳, 醫生講左好多醫學名詞, 我聽唔明, 最緊要健康正常就得, 我又忍唔住問醫生係仔定女, 佢話阿b又翹腳, 突然睇睇下話, "係仔黎架" 我真係呆左陣, 唔係好大機會係女咩???仲有少少眼濕濕, 女錫媽咪多d架麻!

因為阿b 唔轉pose, 照唔到背脊, 所以醫生叫我出去行下, 飲下水, 轉頭再照, 原來都照左半個鐘喇, 係我行行企企既時候, 見到牆上掛左d字, 原來覃醫生以前係qe婦產科院士, 應該好有經驗先做到卦~

跟住pair大陸人夫婦睇完俾診金果陣, 我見到佢銀包有成寸厚既金牛呀!! 駛唔駛帶咁多cash呀?唔驚俾人偷咩?

等左半個鐘又入去照多次, 今次阿b好少少, 都肯郁下,  醫生又講多次"係仔黎架" , 又hurt多次, 但都睇唔晒背脊, 無辦法啦, 下次再照過~

其實覃醫生都幾好, 不過未試過照超聲波果陣, 醫生會放隻手係我大脾度, 搞到我唔係幾舒服, 又唔好意思叫佢拎開隻手, 而且又貴過王醫生2百幾蚊, 如果公司有得claim 睇佢都無所謂, 無得claim 就睇番王醫生算lu~

19 wk 第一次廣華產檢

因為老公唔得閒, 所以搵左媽咪陪我去產檢, 因為d 人話要等好耐, 所以帶定野飲, 買定雜誌同包, 上到去放低覆診紙等叫名, 一坐低打開本雜誌就叫我名, 量完血壓 就驗小便, 阿姐話下次要帶小便黎 , 跟住度磅重, 之後就坐低等叫名抽血, 跟住嗌幾個名坐係度等抽血, 抽果陣已經話會有少少痛, 抽完都有d痛, 估唔到痴膠布果陣都仲有d痛, 好在無頭暈, 等左幾個字就有得見醫生, 問左一輪病歷就上床檢查, check 下bb 心跳, 臨走前仲提我要均衡飲食, 唔駛飲媽咪奶粉, 我話" 我都唔鍾意飲奶"

出番去坐等攞覆診紙, 多左好多人, d 位都差唔多坐滿, 等左4個字先有覆診紙, 仲要落地下等20幾個number攞葉酸, 好多人咳, 我又無帶口罩, 搞到我好鬼驚~

準備走果陣見到有人派媽咪會d form, 填完攞番小禮物就食lunch, 仲諗住可以行下街, 點知越落越大雨, 都係返屋企先

東歐11天自由行-Day 11 Prague-Dubai-HKG

7點幾就出發影相,行到市民會館都係得好少人, 可以放腳架影合照

Charles Bridge都唔多人, 想點影都得

好難得天文鐘無人行黎行去, 影完舊城廣場就行番酒店食早餐, 食完返房訓陣就check out

拖喼行去Florenc巴士站, book 左11點半巴士去機場, 因為架車先停機場再去Karlovy Vary, 所以架車都幾full, 唔駛45分鐘就到機場, 得我同老公落車, check in 都唔駛等好耐, check 完in 又食麥記, 因為通常禁區入面既餐廳都貴d, 食完去billa 買野駛晒d kc

飛機餐都幾好食,係轉機辛苦d, 係杜拜又要等3個幾鐘, 又無long腳位坐, 唯有又有麥記消磨時間,最慘先停曼谷, 係架機度等2個幾鐘先飛返香港,不過攞行李果陣發覺老公個喼變左平行四邊形, 老公諗住換喼, 所以無claim, 但對Emirates d印象就麻麻喇..........

東歐11天自由行-Day 10 Prague

今日行小城區同買手信, 一早經過charles bridge,天色好過上個禮拜好多, 遊客都多左, 聖約翰雕像要排隊摸

過完橋向聖尼古拉教堂行,教堂入場費要70kc, 原來呢個教堂都幾靚, 仲有得上樓上

跟住又行上城堡, 咁啱上到去12點, 有得睇換兵操

睇完行落山食lunch, 見到麥記有新野, 就入去試下, 茄汁要收錢, 所以無要到, 食飽去埋toilet先走,原來要收錢, 不過廁格又大又乾淨, 都算俾得值既

跟住去隔離MANUFAKTURA買hand cream, 買完仲送張7折咭俾我去天文鐘附近間分店買野, 好彩買左2支試下, 再買有7折抵好多

沿住河邊行, 行到公園有隊泰國人係度拍野, 不過我都唔識, 仲經過上個禮拜食ribs間餐廳

行到過橋見到有一家天鵝, 2隻天鵝一前一後護住d 細天鵝, 可惜太遠, 餵唔到佢地

行左幾個字, 終於行到Tesco, 呢間好似又一城間Taste, 唔算好大, 見milka好多款, 買左排黎試下, 諗住買溫泉餅做手信, 要50幾kc一盒, 但價錢好似貴過billa, 所以無買到

於是行番去酒店附近間 albert 買溫泉餅, 都係40幾kc一盒, 我地買左一籃做手信, 買完番酒店放低抖下又出去食飯

又去番頭先經過果間NOSTITZ, 不過我地覺得差過上次好多, ribs又唔夠入味, 雞翼又包唔晒d汁, 早知食酒店對面間pizza啦.........

食完就行對面個公園行番出charles bridge, 係charles bridge附近條河仔又見番d天鵝, 好彩今朝係酒店攞左2塊包諗住餵天鵝, 點知餵餵下走晒去餐廳果邊, 原來餐廳掟左好多麵包碎出黎, 成班游晒去果邊食

餵完天鵝就行去天文鐘附近間shop買cream, 聽日要走, 真係唔捨得.............

番去早d抖, 聽朝早d出去影相!

東歐11天自由行-Day 9 Budapest-Prague

今日坐9:15am既student agency巴士返布拉格, 未夠8點就走喇, 老公又驚搵唔到個站 ,miss 左班車喎, 用尋日張1 day pass 搭地鐵去Népliget M, 901巴士站個出口就係喇, 果度仲有間pub , 係我地搭orangeway 落車既斜對面, 我地剩番300ft 留番去廁所, 其他ft尋晚去supermarket 買左pesto sauce , 8點半就到巴士站, 輪流去完廁所都要等多幾個字, 初頭得4個人等車, 跟住都有20幾人等, 9點架車就到, 俾靚仔哥哥check 完d email 就上得車, 呢架車d位闊過之前搭果d, 可能因為要搭8個鐘 , 今次真係揀錯位, 我揀左中間樓梯隔離個位, 個位都無得伸腳, 枱面又污漕, 地下又痴立立, 好彩坐唔滿, 老公坐隔離果排,坐左3個零鐘就到Bratislava, Bratislava凍好多, 又落雨, d風係欄邊都吹上黎,凍死我喇.......好彩架車仲未滿, 我地又坐得舒服d, 諗住架車停定去toilet 穩陣d, 但發覺入面開唔到燈, 所以唔去住, 但開左車再去都開唔到燈, 咪問靚仔哥哥d燈係咪壞左, 佢話唔係, 架車停左, toilet 既燈都會停埋, 因為驚d人走人黎借廁所, 佢叫番司機開燈就得, 好彩toilet 都算乾淨, 又唔算多人去, 係去果陣要耷低個頭, 訓下覺, 睇下電影, 下晝2點幾到Brno, 今次有成20幾人等上車, 我地要逼住坐喇, 好彩唔駛5點到Florenc, 初頭諗住8個鐘巴士好難捱, 但係食下,訓下,睇下電影,睇下風景, 咁就過左, 落左車就拉喼返之前間酒店

等check in果陣影下 lobby

去酒店街口間中國餐館食炒麵, 不過維也納好食d, 食飽行過去瓦次拉夫廣場, 影下國家博物館

經過哈維爾市集, 不過收左檔, 又番舊城廣場影下相, 影相行去Charles Bridge 隔離條橋影相

終於等到天黑, 影下夜景, 呢相老公影得幾靚

東歐11天自由行-Day 8 Budapest

係 apartment食完早餐就出發, 出番地鐵站對面馬路搭巴士上城堡山, 去到巴士站見到十幾二十人企係度 , 仲以為等緊車, 但巴士站又停左架巴士仔, 原來係我地要搭既16號巴士, 巴士既窗及凳底都有Graffiti

10分鐘左右就上到山, 行到馬提亞斯大教堂就開始落雨, 仲越落越大 , 等左5分鐘左右細雨少少, 就入馬提亞斯大教堂, 教堂又裝修, 要係教堂對面既售票處買飛

行完教堂都無停雨, 過左漁夫堡下面果層影相,都係咁大雨, 當我地決定行去皇宮果陣, 又開始停雨喎, 我地行到最尾二樓餐廳出面既位影相, 望過去要俾錢上二樓果邊好多人, 我地果邊反而少人d仲唔駛錢

行到過皇宮終於有D陽光,望過去蓋列特山同自由女神像,原本想去埋,不過唔夠時間, 而且維也納民宿個屋主都話黎過布達佩斯幾次都未去過,佢話覺得D風景麻麻~

出皇宮搭番16號巴士落山, 返APARTMENT煮野食 , 食飽抖陣再去番聖史蒂芬教堂

仲有HOLY RIGHT HAND睇~

跟住又行番去49號電車站搭電車落中央市場, D辣椒粉同鵝肝有好多款, 間間賣D野都差唔多, 選擇困難症又發作, 決定去TESCO 先買手信

行完中央市場又搭返車番Deák Ferenc tér M站轉地鐵去Blaha Lujza tér M既NEW YORK CAFÉ 嘆 TEA, SERVICE幾好, COFFEE好飲, CAKE都好食, 不過2杯野同一件CAKE差唔多200港紙, 真係有D肉痛, 算啦, 咁遠黎到, 點都要試下!

嘆完tea搭地鐵去Keleti pályaudvar M站, 行去附近既Arena Plaza行Tesco, 成間Tesco都無英文指示牌, 我地行左個圈都搵唔到鵝肝醬, 所以出去問收銀,
個收銀睇完張相就話"I don't know" , 指左我地去賣罐頭果行, 原來同罐頭魚放埋一齊, 不過d包裝唔同中央市場果d, 係細盒錫紙盒,
算啦, 平好多, 用黎做手信就啱, TESCO 入面真係一個外國人都見唔到, 原來布達佩斯d人都幾高大, 男女都有5尺8,9寸高,
調味料有成行,原本想買d返香港, 但係太多揀唔到, 剩係買左辣椒粉, 買多2個麵包聽日搭車返布拉格食

跟住搭地鐵去Deák Ferenc tér M站,行去河邊轉2號電車去食DINNER, 呢間餐廳都有D懷舊FEEL, D燈光暗暗地, 啱埋撐枱腳, 個GOULASH SOUP 無尋日咁鹹, 但D牛肉就似湯渣, 老公叫果碟好似宮保雞丁 , 食落甜甜地, 佢唔係幾鍾意, 我果個係炸芝士配 cranberry sauce 都OK既, 但無 EXPECT咁好食, 有D後悔無試MENZA

食飽又搭番電車去河邊影夜景 ,布達佩斯既夜景真係好靚, 靚到好似假咁, 影完相返去早抖, 聽朝搭車返布拉格~