淘~孕婦褲

之前係呢間野買左牛仔褲, leggings 同返工褲, 都幾好著, 所以買埋運動褲 , 一條厚, 一條薄, 諗住係屋企同落街著都得, 要買多條厚返工褲, 先夠數免郵,  收左貨, 厚款真係幾鬼厚, 10度都唔驚凍親對腳, 等下個月收番淘寶回扣再諗下有乜好買~

淘~孕婦內衣

 依家個肚又開始大, 之前係千色店買左幾個孕婦bra 唔係幾夠用, 每個要百幾蚊,  我見個招牌寫君心, 又係簡體字, 所以係淘寶search 下, 點知真係有, 價錢仲平3分一, 不過d 款麻麻地, 所以搵左第二間買, 我見呢間銷量第一既bra賣左6萬幾個, 評語都幾好, 應該唔差得去邊, 所以訂左6套, 買d 無鋼圈生完都可以用

呢套最平, RMB50

呢套最貴, RMB90

收左貨d質地都幾好, 車工都唔錯, 無刺鼻味, 每個 bra都送延長扣, 早知早d買, 唔駛日日手洗~

回顧

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
8月頭去澳門, 本應period到,但等下等下遲左一個禮拜都無, 再等多一個禮拜就搵醫生驗孕, 專登駛開老公 , 叫佢番屋企先, 點知佢買埋報紙坐係診所等 , 驗完等左陣見醫生, 醫生話"係有左" , 果刻真係唔係好信, 因為d徵狀真係好似 period, 爆瘡, 肚脹, 咁就有左??

到攞醫生信果陣, 個姑娘竟然話呢封係懷孕證明 , 搞到成個診所都聽到, 唉, 無得同老公講添, 我老公無表情, 問佢有乜野感覺就係度傻笑 , 我個fd介紹睇林翠苗, 打電話去book排到10月頭 , 點知8月尾就流血, 雖然流量唔算多, 但到入急症室 check 下穩陣d , 仲諗住急症室有得照超聲波 , 點知醫生話要婦科先有得照, 所以要留院觀察,  搞左一輪上去等見醫生, 有個後生靚仔男醫生睇我, 問我有無流血塊同白色物體, 搞到我有d驚, 我問醫生係咪作小產, 佢話係, 不過好多大肚婆都會有, 跟住男醫生幫我做檢查, check完個胸 就用個鴨咀箝檢查, 搞到我有d痛, 我一痛就周身郁,  醫生同姑娘叫我放鬆d, 我心諗, 有d凍冰冰既野插入黎點放鬆呀?

跟住另外一個女醫生幫我做超聲波檢查, 佢話見到胎囊但未見到心跳, 見我唔係流好多血可以唔駛留院, 即時開心晒, 仲問我要幾日sick leave , 我話一日得喇, 即刻打俾老公

放假順便攞埋醫生信去廣華登記, 有個中年西裝友同個女人黎登記, 姐姐問佢住邊, 佢話"新界羅, 唔登記得架咩?" 姐姐話分左區, 佢仲話佢朋友住新界都係廣華生, 點解佢唔得, 仲問幾時分區, 又問人攞威爾斯電話, 攞完打去無人聽又問姐姐點算, 真係好鬼煩, 好心佢黎登記前 search 資料下先啦~

雖然check完無乜野, 但都想睇多次私家, 好彩林翠苗有位, 可以睇左先, 林醫生講野都幾快, 我有幾次都聽唔清楚佢講乜, 一照超聲波, 胎囊多左一點眨下眨下, 醫生話佢有心跳喇! 仲開左bb既心跳聲俾我聽, 撲撲,撲撲, bb 有6w5d大, 醫生話90%穩定, 當堂安心晒......


因為林醫生太難book 喇, 所以轉左王學勤醫生, d人話易book 又平, 10wk第一次睇王醫生, 佢知我作小產, 又幫我用鴨咀箝檢查, 我又係度郁, 醫生話個箝係死物, 如果我郁得多會仲唔舒服 , 所以我係咁深呼吸, 好彩醫生話無流血,  照超聲波果陣見到阿b,已經有手腳, 仲係度郁身郁細, 扮打拳, 醫生話佢好活躍, 我見到佢都好開心, 診金係林醫生既差唔多一半, 真係幾抵, 又易book, 係d儀器舊d

陀左2個幾月個肚成日扯住痛, 但無流血, 所以無睇醫生, 個胃又頂住頂住, 要慢慢食, 仲好易攰, 坐係度睇電視都訓著, 行一個鐘已經好攰, 老公仲叫我行山, 我都費時踩佢

10月2日陀左阿b 3個月, 之前果晚約左fd打邊壚 , 原來佢都有左2個月, 仲係twins, 真係好喇~

終於可以公告天下, 老公同屋企人講竟然無人信佢講野, 同我屋企人講, 我細路問改左名未, 我話仔定女都未知,點改呀?

10月7日去左廣華做oscar, 等左幾個字就見得姑娘, 點知阿b成個倒轉左, 要出去行下, 等多半個鐘先入番去照, 阿b翹實對腳, 得閒摸下面,  好快姑娘 check完話低風險

11月頭又睇王醫生, 今次阿b無乜點郁, 原本應該16wk大, check 完應該係17wk大, 阿b又幾吸收喎~

21 wk 照結構

今日下晝去覃伯英醫生度照結構超聲波, 跟住又有pair大陸人夫婦黎睇, 係我地隔離係咁講鄉下話, 好鬼嘈. 等左幾個字就見醫生, 個mon都幾大, 老公坐係我隔離, 一開始照個腦同五官, 跟住照個心肺,腎 手手腳腳, 醫生講左好多醫學名詞, 我聽唔明, 最緊要健康正常就得, 我又忍唔住問醫生係仔定女, 佢話阿b又翹腳, 突然睇睇下話, "係仔黎架" 我真係呆左陣, 唔係好大機會係女咩???仲有少少眼濕濕, 女錫媽咪多d架麻!

因為阿b 唔轉pose, 照唔到背脊, 所以醫生叫我出去行下, 飲下水, 轉頭再照, 原來都照左半個鐘喇, 係我行行企企既時候, 見到牆上掛左d字, 原來覃醫生以前係qe婦產科院士, 應該好有經驗先做到卦~

跟住pair大陸人夫婦睇完俾診金果陣, 我見到佢銀包有成寸厚既金牛呀!! 駛唔駛帶咁多cash呀?唔驚俾人偷咩?

等左半個鐘又入去照多次, 今次阿b好少少, 都肯郁下,  醫生又講多次"係仔黎架" , 又hurt多次, 但都睇唔晒背脊, 無辦法啦, 下次再照過~

其實覃醫生都幾好, 不過未試過照超聲波果陣, 醫生會放隻手係我大脾度, 搞到我唔係幾舒服, 又唔好意思叫佢拎開隻手, 而且又貴過王醫生2百幾蚊, 如果公司有得claim 睇佢都無所謂, 無得claim 就睇番王醫生算lu~

19 wk 第一次廣華產檢

因為老公唔得閒, 所以搵左媽咪陪我去產檢, 因為d 人話要等好耐, 所以帶定野飲, 買定雜誌同包, 上到去放低覆診紙等叫名, 一坐低打開本雜誌就叫我名, 量完血壓 就驗小便, 阿姐話下次要帶小便黎 , 跟住度磅重, 之後就坐低等叫名抽血, 跟住嗌幾個名坐係度等抽血, 抽果陣已經話會有少少痛, 抽完都有d痛, 估唔到痴膠布果陣都仲有d痛, 好在無頭暈, 等左幾個字就有得見醫生, 問左一輪病歷就上床檢查, check 下bb 心跳, 臨走前仲提我要均衡飲食, 唔駛飲媽咪奶粉, 我話" 我都唔鍾意飲奶"

出番去坐等攞覆診紙, 多左好多人, d 位都差唔多坐滿, 等左4個字先有覆診紙, 仲要落地下等20幾個number攞葉酸, 好多人咳, 我又無帶口罩, 搞到我好鬼驚~

準備走果陣見到有人派媽咪會d form, 填完攞番小禮物就食lunch, 仲諗住可以行下街, 點知越落越大雨, 都係返屋企先

東歐11天自由行-Day 11 Prague-Dubai-HKG

7點幾就出發影相,行到市民會館都係得好少人, 可以放腳架影合照

Charles Bridge都唔多人, 想點影都得

好難得天文鐘無人行黎行去, 影完舊城廣場就行番酒店食早餐, 食完返房訓陣就check out

拖喼行去Florenc巴士站, book 左11點半巴士去機場, 因為架車先停機場再去Karlovy Vary, 所以架車都幾full, 唔駛45分鐘就到機場, 得我同老公落車, check in 都唔駛等好耐, check 完in 又食麥記, 因為通常禁區入面既餐廳都貴d, 食完去billa 買野駛晒d kc

飛機餐都幾好食,係轉機辛苦d, 係杜拜又要等3個幾鐘, 又無long腳位坐, 唯有又有麥記消磨時間,最慘先停曼谷, 係架機度等2個幾鐘先飛返香港,不過攞行李果陣發覺老公個喼變左平行四邊形, 老公諗住換喼, 所以無claim, 但對Emirates d印象就麻麻喇..........

東歐11天自由行-Day 10 Prague

今日行小城區同買手信, 一早經過charles bridge,天色好過上個禮拜好多, 遊客都多左, 聖約翰雕像要排隊摸

過完橋向聖尼古拉教堂行,教堂入場費要70kc, 原來呢個教堂都幾靚, 仲有得上樓上

跟住又行上城堡, 咁啱上到去12點, 有得睇換兵操

睇完行落山食lunch, 見到麥記有新野, 就入去試下, 茄汁要收錢, 所以無要到, 食飽去埋toilet先走,原來要收錢, 不過廁格又大又乾淨, 都算俾得值既

跟住去隔離MANUFAKTURA買hand cream, 買完仲送張7折咭俾我去天文鐘附近間分店買野, 好彩買左2支試下, 再買有7折抵好多

沿住河邊行, 行到公園有隊泰國人係度拍野, 不過我都唔識, 仲經過上個禮拜食ribs間餐廳

行到過橋見到有一家天鵝, 2隻天鵝一前一後護住d 細天鵝, 可惜太遠, 餵唔到佢地

行左幾個字, 終於行到Tesco, 呢間好似又一城間Taste, 唔算好大, 見milka好多款, 買左排黎試下, 諗住買溫泉餅做手信, 要50幾kc一盒, 但價錢好似貴過billa, 所以無買到

於是行番去酒店附近間 albert 買溫泉餅, 都係40幾kc一盒, 我地買左一籃做手信, 買完番酒店放低抖下又出去食飯

又去番頭先經過果間NOSTITZ, 不過我地覺得差過上次好多, ribs又唔夠入味, 雞翼又包唔晒d汁, 早知食酒店對面間pizza啦.........

食完就行對面個公園行番出charles bridge, 係charles bridge附近條河仔又見番d天鵝, 好彩今朝係酒店攞左2塊包諗住餵天鵝, 點知餵餵下走晒去餐廳果邊, 原來餐廳掟左好多麵包碎出黎, 成班游晒去果邊食

餵完天鵝就行去天文鐘附近間shop買cream, 聽日要走, 真係唔捨得.............

番去早d抖, 聽朝早d出去影相!

東歐11天自由行-Day 9 Budapest-Prague

今日坐9:15am既student agency巴士返布拉格, 未夠8點就走喇, 老公又驚搵唔到個站 ,miss 左班車喎, 用尋日張1 day pass 搭地鐵去Népliget M, 901巴士站個出口就係喇, 果度仲有間pub , 係我地搭orangeway 落車既斜對面, 我地剩番300ft 留番去廁所, 其他ft尋晚去supermarket 買左pesto sauce , 8點半就到巴士站, 輪流去完廁所都要等多幾個字, 初頭得4個人等車, 跟住都有20幾人等, 9點架車就到, 俾靚仔哥哥check 完d email 就上得車, 呢架車d位闊過之前搭果d, 可能因為要搭8個鐘 , 今次真係揀錯位, 我揀左中間樓梯隔離個位, 個位都無得伸腳, 枱面又污漕, 地下又痴立立, 好彩坐唔滿, 老公坐隔離果排,坐左3個零鐘就到Bratislava, Bratislava凍好多, 又落雨, d風係欄邊都吹上黎,凍死我喇.......好彩架車仲未滿, 我地又坐得舒服d, 諗住架車停定去toilet 穩陣d, 但發覺入面開唔到燈, 所以唔去住, 但開左車再去都開唔到燈, 咪問靚仔哥哥d燈係咪壞左, 佢話唔係, 架車停左, toilet 既燈都會停埋, 因為驚d人走人黎借廁所, 佢叫番司機開燈就得, 好彩toilet 都算乾淨, 又唔算多人去, 係去果陣要耷低個頭, 訓下覺, 睇下電影, 下晝2點幾到Brno, 今次有成20幾人等上車, 我地要逼住坐喇, 好彩唔駛5點到Florenc, 初頭諗住8個鐘巴士好難捱, 但係食下,訓下,睇下電影,睇下風景, 咁就過左, 落左車就拉喼返之前間酒店

等check in果陣影下 lobby

去酒店街口間中國餐館食炒麵, 不過維也納好食d, 食飽行過去瓦次拉夫廣場, 影下國家博物館

經過哈維爾市集, 不過收左檔, 又番舊城廣場影下相, 影相行去Charles Bridge 隔離條橋影相

終於等到天黑, 影下夜景, 呢相老公影得幾靚

東歐11天自由行-Day 8 Budapest

係 apartment食完早餐就出發, 出番地鐵站對面馬路搭巴士上城堡山, 去到巴士站見到十幾二十人企係度 , 仲以為等緊車, 但巴士站又停左架巴士仔, 原來係我地要搭既16號巴士, 巴士既窗及凳底都有Graffiti

10分鐘左右就上到山, 行到馬提亞斯大教堂就開始落雨, 仲越落越大 , 等左5分鐘左右細雨少少, 就入馬提亞斯大教堂, 教堂又裝修, 要係教堂對面既售票處買飛

行完教堂都無停雨, 過左漁夫堡下面果層影相,都係咁大雨, 當我地決定行去皇宮果陣, 又開始停雨喎, 我地行到最尾二樓餐廳出面既位影相, 望過去要俾錢上二樓果邊好多人, 我地果邊反而少人d仲唔駛錢

行到過皇宮終於有D陽光,望過去蓋列特山同自由女神像,原本想去埋,不過唔夠時間, 而且維也納民宿個屋主都話黎過布達佩斯幾次都未去過,佢話覺得D風景麻麻~

出皇宮搭番16號巴士落山, 返APARTMENT煮野食 , 食飽抖陣再去番聖史蒂芬教堂

仲有HOLY RIGHT HAND睇~

跟住又行番去49號電車站搭電車落中央市場, D辣椒粉同鵝肝有好多款, 間間賣D野都差唔多, 選擇困難症又發作, 決定去TESCO 先買手信

行完中央市場又搭返車番Deák Ferenc tér M站轉地鐵去Blaha Lujza tér M既NEW YORK CAFÉ 嘆 TEA, SERVICE幾好, COFFEE好飲, CAKE都好食, 不過2杯野同一件CAKE差唔多200港紙, 真係有D肉痛, 算啦, 咁遠黎到, 點都要試下!

嘆完tea搭地鐵去Keleti pályaudvar M站, 行去附近既Arena Plaza行Tesco, 成間Tesco都無英文指示牌, 我地行左個圈都搵唔到鵝肝醬, 所以出去問收銀,
個收銀睇完張相就話"I don't know" , 指左我地去賣罐頭果行, 原來同罐頭魚放埋一齊, 不過d包裝唔同中央市場果d, 係細盒錫紙盒,
算啦, 平好多, 用黎做手信就啱, TESCO 入面真係一個外國人都見唔到, 原來布達佩斯d人都幾高大, 男女都有5尺8,9寸高,
調味料有成行,原本想買d返香港, 但係太多揀唔到, 剩係買左辣椒粉, 買多2個麵包聽日搭車返布拉格食

跟住搭地鐵去Deák Ferenc tér M站,行去河邊轉2號電車去食DINNER, 呢間餐廳都有D懷舊FEEL, D燈光暗暗地, 啱埋撐枱腳, 個GOULASH SOUP 無尋日咁鹹, 但D牛肉就似湯渣, 老公叫果碟好似宮保雞丁 , 食落甜甜地, 佢唔係幾鍾意, 我果個係炸芝士配 cranberry sauce 都OK既, 但無 EXPECT咁好食, 有D後悔無試MENZA

食飽又搭番電車去河邊影夜景 ,布達佩斯既夜景真係好靚, 靚到好似假咁, 影完相返去早抖, 聽朝搭車返布拉格~

東歐11天自由行-Day 7 Vienna-Budapest

一早起身執好野準備搭巴士去布達佩斯, 我地搭11點巴士, 差唔多10點就走喇, 同民宿屋主say goodbye 同攞番d按金就拖喼去巴士站, 講真對維也納無乜留戀 , 景點距離都幾遠 , 物價又貴 , 而且日日都要8點9前返黎, 因為樓下會鎖閘 , 雖然屋主有俾匙我地 , 但我地驚唔識開 , 到時都唔知點算 , 返到民宿又無電視睇, 淨係上網同煲劇 , 又靜又悶 , 所以走果陣我地都好開心
原來民宿同火車站真係幾近, 唔駛10分鐘就到Praterstern火車站, 巴士站係火車站後面 , 不過我地行左去摩天輪果邊 , 應該係左手邊至啱 , 臨上車幫襯火車站個€0.5 toilet , 企係個機場巴士站等左陣就見到orangeway 架巴士 , 等人落晒車就排隊準備上車 , orangeway放行李係車底要€1/1件,俾完個哥哥睇email之後就上車 , 今次揀坐近車頭 , 前後排都無人坐 , 隔離果排坐左對香港人情侶,  老公話架巴士好似皇崗巴 , 我又唔覺 , 係有d舊 ,坐係巴士等開車果陣有d口渴 , 果陣先醒起雪左支雀檸係民宿雪櫃 , 唉, 蝕左添...........

準時11點開車 , 先停維也納機場, 無人上車 , 我同老公就一人坐2個位 , 好舒服, 又有得飲熱朱古力 , 3個鐘左右就到Népliget地鐵站對面個球場 , 一停車, 果個香港男仔就大叫 "佢真係黎接我地呀!! x2 ", 我心諗,"知喇,有人黎接駛唔駛咁大聲呀?!"

我地落隧道過地鐵站買飛 , 不過唔收euro , 所以過番Népliget巴士站度唱錢 , 上一層行去eurolines買飛隔離就有得唱錢 , 我地淨係唱左€10 , 出到去先唱多d

買完飛落月台 , 有2個staff做人肉入閘機 , show一show張飛俾佢睇就得 , 架地鐵真係幾殘 , 好彩有位坐~

今次係布達佩斯book左apartment, 係布拉格果陣收到apartment個 email叫我通知佢大概幾點到,因為無reception , 我覆佢3點左右到

出地鐵站要抬行李行十幾級樓梯上地面 , 街口有間24小時 supermarket , 行左7-8分鐘就到, 我地去到樓下等左陣, 老公問隔離座既看更伯伯, 佢幫我地打俾個屋主, 點知個屋主話收唔到我email , 所以唔知我幾點到...........
佢話叫同事過黎,叫我地去lobby等下 , 好彩有好心既看更伯伯,如果唔係唔知等到幾時..........
係lobby check下email, 原來apartment之前果晚send過email黎, 不過果陣我已經check左email, 所以睇唔到.........我都有d疏忽既, 無收到佢confirmation email應該再send多次~

終於有人帶我地上房, 有lift, 走廊乾淨, 入到個單位,見到有2間房, 但唔同我book 既樣, 於是問個姐姐係邊間, 佢話係全個單位都係我地用!!

聽到真係好開心, 可能見我地等得耐, 所以upgrade我地間房, hehe

抖左陣就去食野
首先去姐姐介紹既舖頭唱錢, 個rate好過巴士站少少

呢間餐廳又係上網搵番黎, hostel既人介紹, 話佢既Goulash Soup 連媽咪都讚好飲

Goulash Soup真係幾好飲, 又多料, 牛肉又嫰 , carbonara都幾好, 另外果個蝦意粉就怪怪地

食飽諗住過對面既聖史蒂芬教堂, 但係圍晒帶 , 又有d西裝友企係門口,所以無去到, 搭地鐵去英雄廣場

個站好懷舊, 我地係度影相, 地鐵個staff 好好人話幫我地影, 真係nice!!
行完英雄廣場又去埋後面個公園行下

跟住搭地鐵去Vörösmarty utca‎ 再行去House of Terror, 影完又去前面街既Burger King借廁所, 間Burger King裝修得幾靚 ,經過原本今晚食dinner既餐廳, 不過4點先食完野,真係好飽, 所以食唔到............

行過Match Supermarket買左支2公升可樂飲, 因為平過細支裝, 行到歌劇院入去睇下, 入面真係好懷舊, 裝修都keep 得好好

返apartment抖下等天黑去影夜景, apartment附近係49號電車總站, 去中央市好方便~
差唔多9點先開始天黑,布達佩斯既夜景真係好靚, 不過唔知點解鏈橋上面好多小昆蟲飛黎飛去, 影完相都10點喇,過番Váci street 既burger king 食野,
11點幾先返到apartment, 好彩條街都幾多人行, 唔係都幾驚~