小王子3個月大喇~

小王子3個月大喇, 前2日幫小王子度高磅重, 有15磅,63cm高, 一日食7-8餐媽媽奶, 1-2餐奶粉

依家小王子對食奶都有要求, 以前一喊, 塞乜野入佢口都肯食, 依家又嫌冰奶腥,初頭1份冰奶溝2份凍奶都肯食,依家要 1份冰奶溝3份凍奶先肯食, 放假見有凍奶剩, 坐暖俾佢飲, 點知擘大個口含住奶咀唔食, 拎走奶樽就喊, 跟住就挨埋我心口咀擘擘, 原來要食新鮮媽媽奶~~依家放工返去見佢未食晒d奶粉, 幫手餵下,又係擘大口唔食, 一路喊一路挨埋我心口, 又要食新鮮媽媽奶,小王子真係俾面, 最鍾意食媽媽奶抵錫.......不枉我每日泵4次奶留俾小王子食, 朝早要6點半起身泵奶,跟住係公司泵2次, 每次泵半個鐘, 攞個細蒸餾水樽雪水做冰種, 再加埋迷你冰種, 每日帶返凍奶返屋企, 食完飯又要泵多次,有d麻煩, 不過為左小王子食多d媽媽奶.辛苦d都要, 希望捱到半年啦~

依家帶小王子落街多左, 只要佢食飽就可以帶佢落街陪我地食早餐,行商場, 有人抱住不知幾好訓, 大隻左可以用埋揹帶, 不過唔知點解小王子係咁用我件衫抹面, 搞到塊面紅晒.......次次落街小王子都周圍望, 望到攰就訓, 訓醒就要食奶, 不過通常佢訓醒已經返到屋企

3個月大,扭計多d, 喊得大聲d, 一肚餓就喊到拆天,開奶粉根本唔夠快,最快都係埋身餵, 有時食食下奶又扭眼訓, 喊到聲到拆埋, 呢個時候工人姐姐就走過黎話俾佢抱, 佢話佢抱就唔喊喎, 結果真係唔喊喎, 媽媽真係傷心, 要工人抱唔要媽媽抱, 於是媽媽學工人姐姐打直咁抱, 咪又唔喊, 哈哈哈~ 一直都唔鍾意工人抱小王子, 佢一路抱一路講唔鹹淡國語, 成日以為自己講國語好好, 我用國語問佢野, 呆左咁望住我, 英文又唔得, 同佢溝通真係頭都暈埋, 如果小王子聽得多都唔知點算

小王子依家變左光頭仔喇, 因為d頭泥越出越多, 個頭又痕, 有戴手套都係咁扯頭髮,無戴手套直頭扯都流血, 初頭用bb油搽頭, 甩完又出番, 後尾用oliver oil 搽頭, d頭泥軟身好多, 仲潤d, 小王子扯少左頭, 不過甩下甩下d頭泥連頭髮就無埋喇, 好懷念以前小王子d頭髮飛飛下 ,希望d頭髮出得快d啦~

小王子d皮膚真係唔多好, 未滿月塊面就出d紅色粒粒, 搽左2個禮拜水份cream先好, 跟住條眉就出頭泥, 搽左幾次bb油好番就到個頭出頭泥, 跟住耳背紅晒, 醫生話係濕疹, 搽cream好番好多, 都唔知佢皮膚唔好關唔關我事............





最開心係小王子依家好似認得我, 食完奶對住我一路講bb話一路笑, 麻麻抱住, 我叫佢, 望一望我又笑, 小王子扭計麻麻搞唔掂, 媽媽抱入房一齊訓晏覺, 放落床就笑

下星期100日大要食餐飯慶祝下~