廣華講座-分娩的認識

上個星期六去左廣華聽講座, 初頭以為係CONFERENCE ROOM 之類聽,原來係等做產檢果度聽, 入到去交低張預約紙俾姑娘就得, 仲派張陪產須知俾老公

開頭姑娘講入院帶D乜, 入院文件,身份證, 個人用品(杯,拖鞋, 個人護理用品), 產後用品(網褲,產婦衛生巾(有扣+無扣), 沖洗瓶,綿花), BB用品(紙尿片1包,嬰兒濕紙巾OR方棉抹PATPAT, kitchen paper)

入院之前要洗乾淨化妝品, 指甲油,水晶甲, 除隱形眼鏡,戴有框眼鏡,唔好戴貴重物品

分娩前徵兆:
-見紅
-穿羊水
-有規律宮縮
-腰背痛
-尿頻
-布克斯氏收縮(不規則,無痛宮縮)

入院果陣去急症室登記處登記, 等生果陣要保持平靜, 心情開朗-->呢個有d難度, 食易消化食物, 補充足夠水份, 2-3小時去小便, 多d行等bb個頭快d落

上到房會做陰道檢查,check宮縮

仲有d產房既相, 中間得塊板間開, 所以姑娘話唔好亂嗌救命, 會嚇親隔離, 姑娘話通常d媽咪會嗌"我唔生喇"

跟住講下產程,子宮有規律收縮,宮頸口開始擴張, 要幾個鐘到20幾個鐘

到宮頸全開,聽姑娘指示push, 有需要就剪會陰, 剪之前會打麻醉針->係咪架?

跟住出胎盤同聯針

仲有d 生緊bb既相, 見到bb頭髮果張相真係有d驚~

又講下減痛方法,保持鬆弛, 分散注意力,按摩, 轉姿勢

藥物減痛方法,吸笑氣, 打止痛針(打完20分鐘先有效,可能會嘔,眼訓同bb出世後可能要打解藥),無痛分娩(辦公時間, 公眾假期除外,每日3個名額, 副作用:下肢無力,麻痺,頭痛,發熱, 血壓下降,排尿困難)

陪產果陣老公可以做乜?
-陣痛果陣,鼓勵深呼吸
-抺汗
-按摩

內容都幾好, 起碼知生得果陣會做d乜, 最好係有得攞到診紙, 下堂唔駛請假lu!

終於識踢喇~

之前d人成日問我阿b有無踢我, 我話無, 但阿b識fing手fing腳, 打c egg, 碌黎碌去, 掃腳, 係唔識踢我

尋日打打下字踢我一下, 踢到突起左少少, 不過好彩唔痛, 我個fd試過俾阿b踢到痛醒 , 停晒手望佢踢我, 連踢4下, 諗住錄video 俾爸爸睇, 點知踢完4下就停左.....

阿b成日玩野, 做緊野就係咁郁, 諗住錄video 就停, 我訓覺佢又郁下, 要我轉幾次身先肯訓,半夜起身去完toilet , 佢又醒左, 郁番一輪先訓番, 好似爸爸咁醒訓, 希望阿b出左世唔好搞搞震就好喇~

似媽還是爸

尋日去左林醫生度照4D,等左半個鐘度就見醫生 , 開頭又度下頭圍, 肚圍 同大脾骨, 醫生話係中上size, 跟住就照4D, 阿b玩緊瑜珈, 一隻手打橫遮住塊面, 一隻腳放係頭隔離, 完全睇唔到個樣, 所以醫生話一陣再照過, 出到去飲d甜野同拍下阿b, 等佢醒神d, 隔左陣又照多次, 今次終於無遮面, 隻手放係嘴前面, 個嘴仲要郁郁下, 隻眼都有d郁, 要埋dvd不過未睇, 塊面幾好肉地, 有d似我bb 果陣, 但d 輪廓我覺得似老公, 老公又話似我, 實際似邊個真係要出世先知喇~

28 wk 第三次廣華產檢

前2日又番廣華做產檢, 唔知係咪之前果晚同阿b講要返醫院檢查, 佢5點幾就醒左, 但唔係fing手fing腳, 彈下彈下, 好似做緊小動作, 摸下面, 郁下個身咁啦, 拍左半個鐘到又訓返, 好彩可以訓晏d, 如果唔係真係攰死~

早左2個字到, 仲多人過上次, 好多媽咪都無位坐, 我都企左陣先有位坐, 坐坐下帶住口罩有d焗, 係咁抹汗, 好在隔左陣開大左冷氣, 如果唔係真係驚焗暈~

等左9個字先量血壓, 量完又走去磅下重, 重左2kg, 再等多9個字就有得見醫生, 一入去又係上床check  bb 心跳, 醫生按完肚問bb 有無郁, 我話有, 心諗仲郁得好勁添.....

醫生話陀到中期, 所以等陣要抽血, 仲以為唔駛添~

跟住又問醫生點解呢2日有幾次個肚扯到好實好硬, 醫生話係宮縮, 中期之後就會有, 如果宮縮好密又痛, 可能會早產

出返去抽血, 今次唔痛, 等多幾個字攞返覆診紙就走得, 下次覆診時間又遲多10分鐘, 覆完診食埋飯又要返工, 真係頻撲, 好心張到診紙寫一日啦~

新生嬰兒護理試讀班

 前幾日去左baby planner 上新生嬰兒護理試讀班
是日扁嘴model:

今堂講產前準備,姑娘話媽咪係陪爸爸上堂學野, 媽咪生完最好食野, 餵奶同訓覺, 其他野唔好理咁多

開頭講下餵母乳,姑娘話4-6月餵母乳既百分比好低, 因為多數媽咪要返工, 餵母乳又有壓力, 可能會損同痛, 姑娘話可以餵完奶搽d餵母乳專用羊脂膏,下次餵奶之前抹走, 可以保護乳頭, 姑娘話入院果陣通知姑娘餵人奶, 生完最好半個鐘內餵, 如果真係餵唔到就叫姑娘餵奶粉但用杯仔餵, 驚bb用完奶樽唔肯埋身吮

跟住教點揀奶粉, 要學下點用奶粉餵, 仲要留意bb 便便, 唔係灰白色同有血就ok

bb 面向天訓會無安全感, 餵奶之後最好打側訓,或者加個斜枕訓, 跟住就示範點抱bb, 再輪流實習, 初頭都有d雞手鴨腳, 練練下就好d

bb點解訓得唔好 可能係太熱或太冷,皮膚痕, 寂寞要人抱, 想引人注意, 表達情感奶樽,  頭2個月可以用包被增加安全感, 或者錄定d水喉聲播俾bb聽, 最好係自己開心d, bb都會開心d

跟住到示範點包包被, 包得無姑娘咁靚, 不過都無甩~

跟住又介紹香薰胎教, 香薰濃度要減半, 32 week後可以用可可巴油+維他命e 搽

又講下餵母乳同餵奶粉要準備既野, 同bb出世之後要準備既野 同埋d產前須知

最好係有得實習, 雖然唔算學好多野, 不過唔駛錢算係咁啦~

下個月又上美素佳兒育嬰班, 唔知會唔會多d野學呢~

產前產後六十天講座

上個禮拜去左聽產前產後六十天講座, 諗住落雨應該少人D, 點知仲多人過上次

產前營養:

大肚唔等於食2人分量
食多D有機食物,無添加同無污染,
食少D人工食品,例如:麵包,餅乾,加工肉
少D出街食,少食燕窩, 污染既海產,例如:魚 同魚肚
食多d新鮮,天然,未加工食物
多食五穀類同豆類
多食蕃薯,黑芝麻,合桃 同深色菜
多食好油,e.g 初榨橄欖油
避免精煉油,反式脂肪(e.g. 芥花籽油)
唔好食散丸 e.g.鈣丸,鐵丸,葉酸,維他命c, 因為身體唔易吸收
孕婦綜合維他命易d吸收
懷孕前3個月食0.4mg 葉酸至停止餵母乳為止, 懷孕初期有助腦部及脊柱發展, 否則易有畸胎

DHA:

對胎兒腦部及視力發展重要
媽媽缺乏OMEGA 3 會沮喪同慢性疲勞,建議每星期食2次魚, 避免精煉油,反式脂肪

孕婦飲食要小心:

吸煙OR 二手煙,飲酒會影響胎兒發育或早產
咖啡,茶有單寧會降低鐵質吸收,咖啡因會影響胎兒智力
汽水磷質高易抽筋
食中,西藥前要問醫生

媽媽多飲健康水:

避免飲蒸餾水(酸水)
每日飲2.5 LIT水,確保足夠奶水

如何提升BB抵抗力

母乳提供最適合的早期營養
早D打疫苗

跟住又介紹下D疫苗同幼兒疾病

仲有胎教準備,呼吸法,坐月飲食,之前聽過, 呢次講得簡單左D

填番FORM換禮物, CORDLIFE 對襪仔好得意, 好在中場去TOILET換埋禮物, 唔駛走果陣跟成堆人排隊~

Kinetics「母乳餵哺及幼兒疾病預防」健康講座+護協掃貨

前2日去左聽Kinetics「母乳餵哺及幼兒疾病預防」健康講座, 因為想聽下d疫苗計劃, 第時同阿b打針, 見未夠鐘上護協掃下貨, 一入去掃左2包思詩樂乾棉, 如果唔係一陣要聽講座就掃多2包, 我聽到有個媽咪話上一胎用左一箱乾棉, 咁咪仲要買多10包???
棉花棒無晒幼身, 產婦衛生巾無佩儷, 唔係好想買kotex, 要下次再睇,下次先買埋奶泵,束腹帶, 奶樽刷,咁就無左400蚊

 頭個part 講幼兒疾病,預防方法同埋d疫苗計劃, 送左張coupon, join plan 有9折,  第二part 講母乳好處 , 如何增加母乳, 餵母乳技巧,又講下走佬袋帶d乜, 點幫bb 沖涼,掃風

第二part 個袁姑娘講得好搞笑, 未見過我老公聽講座聽得咁開心, 又示範點帶束腹帶, 坐月飲湯要食埋d渣, 但唔好食花生, 驚阿b敏感, 佢話阿b打完針收唔到聲,可以好似掃風咁打直抱, 掃下打針個位, 阿b好快會收聲~

臨走交番d form 就有福袋, 入面d禮物都幾豐富, 仲送粒喉糖~

思詩樂bb會

估唔到有尿片送, 唔知好唔好用?

準父母湊B全攻略講座

上個禮拜去左聽準父母湊B全攻略講座,估唔到個場都新, 坐得幾舒服,頭果part姑娘講沖涼水温, 點托bb沖涼同去頭泥, 掃風手勢,因為之前聽過, 所以無乜心機, 如果有示範會好d,跟住講吮手指定奶嘴好, 2歲要戒奶嘴, 如果唔係會影響d牙發育, 仲有搵埋佢奶奶上黎講百日哭, 不過好似無夾過咁既, 你一句我一句, 姑娘未講完, 奶奶又開始講, 聽到有d亂,   又講下6個月大要食糊少食奶, 阿b如果摸性器官要分散佢注意力

第二part就講點刺激bb個腦發展, 初頭有d悶, 因為好似跟稿讀, 但講講下又爆句幾搞笑, 佢話胎教爸爸好重要,得閒要同阿b傾偈同講故事, 之前睇過雜誌訪問個爸爸, bb4個月就同佢傾偈,唱兒歌, 到bb出世之後, 爸爸唱番隻歌, bb就唔喊, 果個爸爸都話好surprise, 我都想老公唱歌俾阿b聽, 不過佢死都唔肯,聽完人地講先肯同阿b 傾多d偈咋~
聽音樂可以刺激bb大腦發育,20週之後就可以聽, 不過要聽抒情放鬆, 節奏輕快, 最好得鋼琴或小提琴彈, 即係莫扎特果d, 唔好聽貝多芬果d, 因為太激昂同節奏強烈,管弦樂團唔係幾啱聽
等bb靜靜地先播俾佢聽, 離個肚2-5cm, 每日1-2次, 聽5-20分鐘

仲有運動胎教,有摸下,彈下,拍下,輕輕壓下,刺激BB神經同大腦中樞,增強肢體運動

對小朋友既愛要表現出黎, 家規係大人對小朋友既榜樣

臨走交番CORDLIFE張 FORM 有條口水肩 ,BB沖涼同妊娠紋霜試用裝送,入場有包無花果送

惠氏媽媽會

等左個幾月,終於收到媽媽會張咭,D 贈品都幾啱用,仲有本雜誌送,不過要去旺角攞~

產前、產後綜合課程-運動課

運       
動：產前、產後運動、助產呼吸(即場練習)透過伸展關節及強化肌肉的訓練，

                  

提高生理及心理對生產的預備。

終於等到上運動堂, 專登著條運動褲上堂, 但其他媽咪都係著leggings 同普通褲, miss 有3個小朋友, 仲講左d親身經驗, 佢話未生之前叫人陣痛果陣, 唔好嗌, 唔好叫, 唔好典, 但到自己生都忍唔住又叫又典, 因為真係好痛..........

跟住又講下d入院用品, 可以買kitchen paper 俾阿b墊住飲奶, 去toilet 又可以用下, 生完第一日唔好沖涼, 因為毛孔擴張, 好易冷親

如果自己係屋企穿左羊水就call 屋企人黎接入院, 坐多d, 慢慢行,  用m巾因為羊水會慢慢滲出黎, miss 話佢試過訓訓下覺穿羊水, 所以提議我地8個月到就加定床墊, 生完墊下惡露都好

miss 示範完產前運動就自己練習, 我老公一路睇我做一路笑, miss 會逐個睇下做成點, 我覺得自己做得麻麻地, 返屋企要多d練習, 希望做多d到生果陣有用啦~

跟住又講下呼吸法, 痛痛地要用腹式呼吸, 再痛d用胸式呼吸, 最痛要用肺尖呼吸,仲有生得果陣要點呼吸, 宮縮先push, 唔好嘥力, 唔夠力push 阿b, 佢會縮返入去

miss又示範產後運動, 好似都幾易做

我覺得呢堂都幾有用, 雖然之前睇過d產前運動既書, 但親身示範同練習好好多, 唔駛估估下~