婚後感+大日子回顧

眨下眼結左婚2個禮拜,感覺好攰,講真結左婚無一日真正休息過,攰到唔想見人,搞婚禮果然可以知邊個先係真朋友,有個兄弟結婚前2個禮拜send email俾我老公話教會有活動黎唔到喎,真係離晒譜,半年前已經約左,乜唔可以推其他野架咩?就算真係黎唔到,打個電話都得卦?真係勁唔掂!!

梗係有d人收左帖,人禮都無到啦

當然其他兄弟姊妹好幫得手啦~真係辛苦晒喇

遲d整好d相再分享果日d造型啦~

大日子果日最滿意係出門個part,搞到我眼濕濕,好在無喊到,如果唔係有排搞....

過程好順利,仲快過rundown預既時間,可以係lobby影下相,最搞笑係出酒店門,我d姊妹灑米,俾酒店staff叫佢地唔好灑,哈哈!

估唔到果日有成6pair人係同一間酒店出門,我地準備上車走,見到有人仲影緊d兄弟~

由於教堂要1點半先交場俾我地,所以我係男家化好裝先去教堂換婚紗,搞掂晒到已經2點,果陣已經好心急,點知新郎走入黎話台花未到,教堂話無花唔開始得,新郎打去問花店,花店話我講過地址唔清楚,無mark低我電話喎~

真係搞笑,我打左幾次俾佢地,都無我電話,何況間花店係我教友介紹,無我電話打俾我教友都得卦,如果真係唔知個地址,之前一日都應該要搵人啦,等到臨時臨急先搭的士送過黎,搞到我無晒心情~

集齊人祈完禱,已經落緊雨,要兄弟遮我去入口準備march in,自己又唔記得帶披肩,激死我!

遲左半個鐘開始,終於行得喇,行2步有d唔妥,件婚紗開始墮,我行唔到,成日踩裙腳,行得勁肉酸.......

開始唱詩歌喇,我都跟住唱,但係主席唱錯晒d melody,詩班又唱得唔夠大聲,出唔到詩歌既真正版本,好失望..........

到訓勉果陣,諗住遲左半個鐘牧師會cut短篇野,點知牧師講足13個point!?仲用我老公半夜三更同佢傾偈既野做開場白,我果陣都打左個突,點解同人傾心事既野都攞出黎講呢???聽左陣我已經無心機聽,因為件婚紗係咁跌,花球又重,塊面又俾頭紗遮住,側邊又有d寒風吹過黎,好唔舒服...........

讀誓詞果陣,主禮牧師講講下停左,咁我老公咪讀自己果段羅,點知個牧師又讀番喎,搞到我老公勁尷尬.......

終於到影相環節,勁混亂,主席都唔係跟程序表上面既次序叫人出黎,又唔叫下一批人準備,搞到我都開始"炆"

影完d團體相,又有d人走出黎想單獨影,影左十pair 八pair,純美攝影師都有d唔耐煩,催我地走,話教堂夠鐘交場,其實我都見唔到教堂果人,不過我都想快d走,成個過程都唔enjoy,早d去酒樓好過~

4點8到左酒樓,諗住時間好鬆動,點知化妝化到六點三,整緊頭果陣,奶奶換完衫已經坐係後面等,聽我阿媽話租佢果件媽咪衫都幾貴下,就開始係我後面同大嫂媽咪"哦", 一時又話,"乜咁貴架,之前租都係幾百蚊咋麻", 一時又話"咁貴真係心都赤埋"又話件衫係我話好睇喎~

我都費時理佢,又唔駛佢俾,有野就直接問我啦,做乜要單單打打者

等等下等到7點幾我媽咪先化完妝,果陣先影到大合照,但係台下面越黎越多人企係度等,我見我d同事等左好耐都未影得真係唔好意思~

好多人讚我席前件晚裝好靚,我都好鍾意 but 影影下相,我老公話"你條裙又跌喇",吓,唔係卦,尋日試仲好地地,今日就鬆喇..........估唔到我果日食得咁豐富都瘦左半寸,真係奇怪..........

影相影到8點就換進場deep v婚紗,因為係吊帶,所以瘦左問題不大,痴晒膠紙就ok,件進場婚紗我都好鍾意,勁多lace &珠片,後來我同事問我件進場婚紗駛唔駛咁deep v呀?哈哈,已經收左一寸喇~

8點半播成長片段,8點9準時開席,我食到翅就食唔到野喇~

敬完酒諗住埋枱影相,點知俾人拉上台玩遊戲,淨係夠時間影3圍咋~

上炸子雞又要去換送客晩裝,換完又俾老公拉左去影相,影完已經上緊橙,酒樓就叫我地去門口準備送客,準時10點半............on schedule,yeah!!

我個friend話好耐無試過去飲可以咁早散, 哈哈,梗係啦,我要早攰呀!

11點送完客換番便服準備走人, 11點半執好野,call的士返屋企,好在有個兄弟陪我地搬野,2個人都唔知點搬.....d衫放係新娘房,聽日晏晝黎攞番去還衫,唔夠12點就返到屋企喇~

總括黎講酒樓真係幾幫得手,waiter自動自覺,到時到候有人提你點做, 不過有幾個friend話細碟得滯,炒飯都唔夠分,我又覺得ok wor, 唔知係咪主家席大碟d架呢, 當然埋單有要求俾多d貼士啦~

咁就過左我既大日子喇!