整左油畫框~

新天地既油畫終於收到喇,前幾日拎左幅油畫布去佐敦裱左佢,$100真係抵到爛,質素都幾好架,好過幫襯新天地要成400蚊先裱到啦~問過老細2點先開檔,最夜9點收檔,所以唔駛咁早去

背脊仲有電話地址,不過記得同老細講用木板墊底,如果唔係佢會用紙皮架!

筍崗一日遊

因為上廣州買唔齊野,所以上多次深圳筍崗買野,我地係皇崗搭366號巴士,係筍崗倉庫落車,過番馬路就係百合隆同筍崗文具玩具批發市場喇~
我地11點左右開始行,D舖頭都係啱啱開,無乜人行,係筍崗文具批發市場行先,係地下買左熱溶槍同膠條,行行下又去左睇體育用品,行左成個鐘就去行百合隆,格左幾間價後,都係返立興買野,因為之前整左購物清單,CHECK晒價錢,講價都易D,我既頭號target係繡花上頭睡衣,BLOG友話RMB50件之麻,點知個哥哥開RMB60,我話香港都係賣HK58蚊咋喎,人地介紹先上黎買架麻,講多幾輪佢先肯RMB55送開門利是封同粉紅長利是封咋,買埋其他野都4點喇,過左KFC坐陣就行過去小肥羊食野,途中經過新一佳超級市場,又入去掃下日用品

去到小肥羊都係5點半,我地食到7點就行番去振業賓館附近搭巴士去皇崗,由於戰利品大多,一個旅行袋都裝唔晒,所以又買多一個紅白藍~

開門利是封RMB3(立興), 貼紙RMB3@(立興),人情利是封RMB2/6個, 兄弟姊妹利是封RMB2/6個(立興)

襟花:RMB4/個,(立興,開價RMB6,我話鵬鵬都係賣RMB3.8咋喎~)

上頭睡衣:RMB50(立興), 啤牌:RMB15/6副(立興), 螢光棒:RMB40/3筒(每筒100支), PUNCH:RMB40/2個,絲帶:MB2/餅,花瓣:RMB3(立興)

熱溶槍:RMB20/支,膠條:RMB0.8/支

訂左花球喇~

原本諗住用番影婚紗相買既絲花球or diy,不過睇到人地post agnes b既牡丹花球相出黎,真係越睇越鍾意,咁啱我個friend個同事開花店,咪攞個款問佢要幾錢,原來都要HK1200,咁不如直接訂agnes b啦, HK1650 一set, 東亞卡同匯豐白金卡有九折,計落都係平二百幾蚊者~8月果陣agnes b係wedding expo擺booth已經想訂,不過有人拉我走咋麻
一世人一次,最多以後唔收花羅
agnes b既 staff話要揀多個2nd choice,因為驚12月尾d牡丹唔靚,所以揀左粉紅色風信子,HK1200+HK150有頭花同襟花, 另外加多個新郎襟花夜晚用,結婚前幾日先confirm個款,因為無得refund,所以俾左平既花球價錢先,有牡丹既話就補番差價,希望到時有牡丹啦~

借用 PrincessMeow 既花球相~

教堂綵排

前排去左救主堂綵排,BOOK左幾個月都未黎過,終於可以到此一遊喇!
其實環境都唔錯既,係條斜路麻煩D者,原本約左3點半綵排,諗住3點鐘到可以入去坐下,點知救主堂話有聚會,要3點半先開到門,跟住又落毛毛雨,費時花仔花女淋親,於是又打多一次問可唔可以入去先,點知都係唔得,雖則話人手唔夠者,比我地入去先唔通會搞破壞咩....

綵排到讀誓詞果陣,讀到我眼濕濕,好在無喊出黎,如果唔係真係笑死人喇~到交換戒指果part,救主堂話係戴既手係男左女右,跟住我即刻話"乜唔係男女都係戴左手架咩??"救主堂就話"我地係男左女右...."
但係我覺得戴左手好睇D喎,同埋有意義D羅....

綵排果陣有開風扇,但我都係熱到一額汗,唔知到時會唔會涼D呢??

印好觀禮邀請卡喇~

前幾日攞左photoshop file 去觀塘印館度印邀請卡,因為我唔識整個黑色框線做出血位,求其整個黑色外框就算,不過印館個 staff話唔駛整,佢會幫我地執番,留左d邊位就得,我整4x6寸,佢收我四個卡片位,300G 啞膠卡片,即係$38 X4=$152有成300張
尋日去攞卡,嘩,真係同PHOTOSHOP PREVIEW既一樣,太開心喇,原來自己整都唔係好難者,呵呵

廣州婚紗街之旅-收穫篇

又係時候晒冷買左d乜喇:
左:RMB3@, 右RMB5@                                 左:RMB1.5/2個,右:RMB2@

拉喜:RMB4/2個, 對聯:RMB9/1對(好百年一上扶手電梯果間賣RMB6/1對...)
回禮利是封:RMB1.9/12個, 普通利是封:RMB7.5/50個
長金色利是封:RMB18/50個,粉紅珍珠紙信封:RMB0.6@

紙杯:RMB3/50個,茶具:RMB65(好百年賣RMB55.........)
花炮:RMB3.5@

CUSHION連芯:RMB35/1對(筍崗賣RMB28/1對........)
拖鞋:RMB10/1對

貼紙:RMB3.5@, 花瓣RMB3.5@                              上頭(女):RMB10/SET

褂鞋:RMB38/1對                                              遮:RMB15(點解有公仔既?!)

伴娘花球:RMB45                                                襟花:RMB4@, 手花RMB3.5@

花女花籃:RMB15

總括黎講,係廣州買結婚用品都唔係特別平,如果唔係要上黎攞裙,都係係深圳買算lu~

廣州婚紗街之旅-DAY 2

第二朝一早去萬菱廣場地下間KFC食早餐,食完上去買皇冠仔俾花女,地下有間賣頭飾賣RMB15,跟住去番尋日二樓買髮夾間野度問價錢,佢開價RMB30,我話樓下RMB15咋喎,佢又話做唔到,要RMB20,跟住我地走,佢先叫番我地話RMB15~

 

買完皇冠仔就去德寶買野,去番RMB7.5/50個利是封果間買野,買完再過隔離果間買,不過好後悔係呢間野買,又唔肯減價,D野仲貴過好百年,激死我喇!

跟住搭地鐵返酒店CHECK OUT同寄存行李,再番雅馨攞裙,攞完裙就係婚紗街買褂鞋,CUSHION,花女花籃,伴娘花球,手花同襟花,再番好百年買上頭睡衣,不過要rmb40仲要係淨色果隻,我都係鍾意深圳有繡花果隻多d,所以無買到

跟住雨越落越大,我地都無心機行,所以返酒店執好野就去仁信食lunch,食完lunch hea左陣就去廣州賓館lobby等巴士返香港

個喼同旅行袋都己經fully loaded!

 

廣州婚紗街之旅-DAY 1

我地放低行李就去左樓下間天富海鮮酒家飲茶,不過D點心唔係好掂,菜苗餃有強烈草青味,皮蛋瘦肉粥好重味精,春卷係翻炸,D芋絲"林"晒,窩貼勁大隻,不過勁油,埋單rmb53,仲要全程食二手煙,食完拿拿林走人~
原本諗住打俾雅馨婚紗約攞裙,卡片上既電話打唔通,因為之前約左係天一酒店對面條街既陳國華跌打等,所以試下問人個地址係邊,點知陳國華跌打話間野係對面,我地行入巷仔終於搵到,但係老闆話無接過ORDER,原來係老闆娘接既,間舖係對面街,佢驚我地唔識行所以叫我地係跌打舖等,去到間舖度,老闆娘話D SIZE有D出入,會幫我去即刻改,所以我地聽朝先返去攞,跟住我地搭地鐵過番一德路行,因為之前有人話呢邊D立雜野平D同埋多絲花,不過其實得2,3間賣絲花,個様唔係幾吸引,有2個檔仔賣結婚立雜野,不過都唔係特別平~
跟住行左去萬菱廣場,入面真係好多小禮物,最多係電話繩,匙扣,毛巾蛋糕都有,最平rmb3-4,但d舖頭分類好亂,行到無乜心機,買左排髮夾(RMB20)就走LU~

跟住就過左隔離既德寶行,一入去已經見到有得賣利是封,我地係左手面行入去,普通size既利是封RMB7.5/50個,頭先問婚紗街果頭都要RMB15/50個,但因為已經6點鐘,D舖頭開始收舖,所以我地諗住聽朝先買野~

跟住行番去廣州賓館果邊食牛腩河同雙皮奶

2碗河粉加淨雲吞都係RMB30咋~連羅家良都食過呢間野~

跟住過埋隔離食仁信雙皮奶,2碗都係RMB13,好食過晏晝餐茶好多~

 

食完都係7點幾,跟住去左酒店附近既萬國廣場行家樂福,買左叮意粉唔知好唔好食呢?

廣州婚紗街之旅-交通,住宿篇

上個禮拜六上左廣州攞姊妹裙同埋買立雜野,我係携程訂天一酒店,RMB318一晚,買左環島大陸通直通巴士9:00係太子上車,3個半鐘到就到廣州,不過停到花園酒店果陣,車上仲有十幾人,司機話"仲唔落車?呢度係尾站黎喎!"但我地張飛寫明廣州賓館落車,司機打番公司先肯開車,停左係廣州賓館對面既繽繽廣場就算, 我地拖住喼沿條穚過番對面,行過婚紗街就係天一酒店,不過婚紗街成條街都係鐵架,好似搞緊大工程~


去到酒店 check in 都1點幾喇,佢地話twins唔夠房,俾左間商務房我地,真係勁開心呀!

有樹果條路就係婚紗街喇,好百年就係天一酒店對面~