masalili day 3

今朝都係9點半起身,食完早餐返房執下影相既野,叫黎客幫我地call的士,約左masalili 11點,去到已經有幾pair人係度,因為Oliver幫緊第二個人化妝,所以要等陣,今日影婚紗內景先出外景,Oliver幫我加左個好誇張既頭飾,套內景婚紗著出黎好靚,有d魚尾款,裙尾有一層層lace,腰位仲有d see through,化化下妝果陣聽到啪啪聲,原來係落大雨,幾驚出唔到外景呀, 我地影完梳化同粉紅色板既內景後,就返去換衫,轉妝出外景,不過又要等一輪,搞掂已經2點幾喇,不過個天冇落雨,個心都定d...

第一站去勝興車站,一落車就去左公廁對開個空地影相,企左陣隻手已經有幾粒蚊"爛",小毛幫我地噴怕水,咁先好D,地下又有好多蟻,仲要一路笑,擺POSE好彩影出黎都幾靚!

影完車站大堂就影路軌,我地扮跑上樓梯,ROGER就企左係樓梯頂D石駁上面,幾驚佢跌落黎呀,跟住行上路軌影,ROGER叫我男友抱起我,抱到我就黎跌咁,我地係度狂笑,我仲笑到標眼水,影完路軌就返車度換衫,小毛幫我換頭飾,耳環,4點左右起程去彩璃花房,原來車站同彩璃花房好近,果度叫中社觀光花市,入到去唔係好大,一眼睇晒,不過D花開得好靚, 影影下,見到有PAIR人都係MASALILI,個攝影師係斯斯文文既後生仔,我問小毛係咪 TOMMY,佢話係呀,仲問我點知,哈哈,我都係估下架咋, 影影下越黎越多MASALILI既人黎影相,我又逐個問係邊個,除左認得MARTIN,仲有BEN同JASON, 咁啱影小黃花JASON又係隔離影,佢講野超大聲,嘈死我地...

影埋招牌風車就搞掂,其實最想影係鬱金香,可惜唔啱時間啦....

返到masalili都係6點幾,得我地返左黎,其他人都未返,我同Oliver講係花田撞到好多masalili既人,佢話今日5pair人都係影彩璃花房,勁搞笑,落埋妝,換埋衫都係7點,masalili幫我地call的士去一中街,車費NT120,去左食牛肉麵

 

食完就行街同掃街!

呢間烙餅幾好食,我地食左海苔味

 

我地行去中友百貨果陣,等過馬路見到巴士寫住逢甲夜市,所以行完中友百貨過番馬路等巴士,我地上左35號台中客運既巴士,第一件事問司機係咪去逢甲夜市,司機話係,一人都係NT20咋,好抵呀,係頂湳仔落車司機仲大嗌叫我地向前行轉右就係夜市喇,返逢甲再食過!

 

 

台中客運35號

 

呢間碳燒雞排幾好食~

 

食飽飽返酒店攰攰,聽日揀相~

masalili day 2

我地九點半起身,十點落樓下食早餐,d野都幾好食,我食左法式多士,食完野等黎客幫我地call的士去masalili.不過上的士後發覺司機行既路同尋日我地截果架唔同,攞張地圖睇,發覺佢轉左入小路,轉轉下先返原本既大路,雖然車費比第一日貴NT15,但係印象都唔係幾好...

去到masalili,係隔離巷仔行入去右手面紫色篷就係化妝既地方,入去等左陣,有個女仔介紹自己叫Oliver,係我既造型師,佢個樣好cute,戴住副黑框眼鏡,佢問完我想點整就幫我化妝,第一套係影內景既晚裝,化完裝行入巷尾既studio,第一個景係鋼琴,一開始影果陣我地2個都傻下傻下咁,要Roger,燈光師小毛同Yetta, 逐樣提我地,好快就ok D,Roger成日話我男友笑得好假,叫佢笑得開心d, Roger幫我影左張單人相我好鍾意,個pose好難擺(對於我黎講), 影完Roger仲讚我聰明添,呵呵

影完內景就換婚紗出外景,今日先去童話城堡,車上面有三文治,盒裝飲品,飲管,水,不過三文治都係咬左幾啖,因為怕整花個妝,小毛負責渣車,坐左半個鐘就到

城堡其實係個收費公園叫新社莊園,一落車係停車場影左幾張,跟住入公園度影,比我想像中多人,d人見到我地好開心,行緊都停係度望,我就頭耷耷咁行,到影果陣就當佢地透明,影左陣換粉紅色晚裝,Roger幫我換頭飾同頸鍊,影左一輪天開始暗,Roger驚會落雨,所以叫我地換衫換快d,最後換左紫色晚裝,小毛幫我換頭飾同頸鍊,影左一陣就開始落毛毛雨,不過Roger話唔緊要,睇唔到d雨,所以繼續影,好多張我都鍾意,影完就開始大雨喇,返到MASALILI,缷完妝過番門市填問卷就叫佢地幫我地CALL的士,我地叫司機停係夜市外圍,食完爭鮮先行番黎客,不過果間爭鮮麻麻地,ORDER完壽司,個WAITER竟然係運輸帶度攞碟俾我,真係俾佢激死...食完又係逢甲夜市食下野先返去,聽日再影過!

裝修完成!

裝修終於搞掂喇,由於我地淨係換地板,油牆,換門,改電掣,整燈槽,所以20日就搞掂,如果唔係要整外牆會仲快, 藍色燈槽係咪好靚呢?我揀架,呵呵我地次次開個燈槽,師傅都話藍色好睇, 我地個裝修師傅係我男友姐夫介紹架,佢都幾nice架,我地臨時要改野,都冇托手踭,濕碎野都冇計我地錢, 樣樣野都落手落腳做,唔會求求其其,唔錯唔錯

訂造傢俬@美亞居室-設計師發夢篇

上次睇圖,美亞個設計師BOSCO話畫完個衣櫃間隔再EMAIL俾我地CONFIRM,我地研究完之後發覺C櫃中間用灰色會好睇D,所以MARK低要轉色,另外夾多張相俾佢,叫佢跟住整,費時整錯

我男友再CHECK圖發覺C櫃中間靠牆果邊傾果陣係灰鏡,幅圖寫黑玻璃,衣櫃同床尾幅圖都冇留電掣位,原本諗住度尺師傅畫得咁詳細,應該冇問題,點知D設計師睇完又唔MARK番係幅圖度,如果我地唔係CHECK多次, 做完出黎唔啱係咪又賴我地唔對清楚就CONFIRM 呢?所以我覆番EMAIL話尺寸以度尺師傅為準,有錯漏我地唔會負責!

呢D咁既設計師淨係識扮野,做野咁唔小心,個客講既野左耳入右耳出,佢做既DESIGN咪係衣櫃度加2塊灰鏡咁大把羅,其他都係我男友搵番黎既圖,叫佢跟住整, 我地想加D 其他野就話唔加好睇D羅, 都唔知點解俾我遇到D咁既人.....

燈...燈...燈

終於都裝好燈喇,不過俾係舖頭睇黑左d,因為我地想吊高d,所以轉左係天花個盤,第一次去睇A staff話要加500蚊,第二次B staff話200蚊,我地叫佢寫好型號,價錢係卡片,好彩我地係旺角睇燈一間舖頭睇幾次,咁先冇俾人呃咋!

不過裝燈果個都唔係好掂,約左下晝4-6點裝燈,叫佢上黎之前打電話黎,我地係樓下行下先,點知等到6點師傅都未打黎,我地打俾師傅,佢竟然話裝左??原來佢直接上樓,裝修師傅又係度,佢就自已裝左喇,好彩冇花冇爛者...

 

 

試褂@Hsiao Wedding

上個禮拜上左Hsiao Wedding 試新潮褂,著上身有d似棉襖,哈哈,不過toby話遲d會加番多少花,應該會好睇d既,大家又覺得點呢?

大日子進度表-updated on 21 Jul

婚禮日期：	27 Dec 2009(Sun)
註册地點：	救主堂
婚宴地點：	聚德軒
婚妙／婚禮當日攝影
婚紗相：	新天地 (酒樓送coupon +0 upgrade)
	台中masalili
婚禮當日攝錄：	石仔,pat姐 @ 純美新娘
新娘
婚紗／晚裝：	Hsiao Wedding (2婚紗+2晚裝，包晒所有飾物)
裙褂：	Hsiao Wedding
花球：	Truelove flower or diy
化妝造型：	Innis
新郎
禮服：	Hsiao Wedding
恤衫：	2 件
皮鞋：	Air Force 1??
兄弟姊妹
伴郎：	新郎哥話事
伴娘：	波波
兄弟：	新郎哥話事
姊妹：	阿蝶,Ingrid, Becky, Toby, Caria
宴會MC：	女:未諗, 男:未諗.
女家統籌：	Toby
男家統籌：	未定
伴娘／姊妹服裝：	廣州買
媽媽／奶奶服裝： 老豆服裝:	Hsiao Wedding 訂做西裝
兄弟服裝：	暫定深色西裝 + 紫色TIE
兄弟襟花／姊妹手花：	廣州買
接新娘／註冊
結婚戒子：	PN(8月取) ^.^
花車：	軒武
兄弟姊妹／賓客接送旅遊車：	81088163 鍾生 (應係28/29座)
花車佈置：	租車公司包卦?!
結婚証書套：	diy
戒指枕：	PN送
接新娘遊戲道具：	未諗
紅傘及睡衣：	廣州買
Cushion及敬茶用具：	未搵
利是封：	筍崗買
觀禮Invitation Card：	未諗
婚宴酒席
賓客名單：	有初稿, 要再執
場地佈置：	酒樓包
March-in片頭：	純美新娘包, 不過未搵相
婚宴音樂：	未諗
嘉賓簽名布	純美新娘送一張 / 酒樓送一張
簽名筆	廣州買
酒水：	酒樓提供25枝, 或再買額外紅酒
回禮小禮物	已諗,未買
Table Stand：	酒樓提供
婚宴請帖	酒樓有，9月揀
其他
當日run down：	未諗
嫁妝：	未買
中式禮餅券	奇華已買10張金盈喜
西餅券	美心已買80張
過大禮：	未諗
龍鳳被及上頭用品：	未睇
婚前檢查：	未book
出門酒店：	都會海逸OR YMCA
回門乳豬：	酒樓送
新居：	已有

訂造傢俬-超失望...

因為我地既主人房細,所以要整地台同油壓床,買左樓後,四圍睇下邊度訂造傢俬, 3月中果陣去左土瓜灣間美亞居室睇,我地都覺得幾好,D傢俬幾實淨,仲可以用2房PACKAGE加D錢做我地想要既傢俬,所以我地5月收樓後,月尾就去落訂,我地同落單既陳小姐講我地想整油壓床,C型櫃,電視櫃,地台,衣櫃同梳妝枱,佢話2房1廳套餐(HK23800)加HK3500整地台就OK,仲話可以平D幫我地訂芝華士梳化同金美夢床褥添~

落完訂後話過幾日有人會打黎度尺,等左一個禮拜有人上黎度尺,過多2個禮拜度美亞都冇人打過黎,我男友就打去問,跟住就約左去美亞傾,個"設計師"叫BOSCO,果日我唔得閒,我男友話美亞幫我地訂梳化同金美夢床褥要俾錢先,所以就俾左HK3688+HK2200,因為床褥尺寸改短左,美亞話搵唔到我男友簽名所以打俾我,我見到張單已經覺得唔妥,梳化淨係寫尺寸無寫款式,淨係寫MODEL#, 於是打去美亞問,點知佢話一邊係貴妃椅,而我地係要2個彈腳較,最搞笑佢地寫字樓話2個彈腳較要HK4200,但名華軒賣緊HK3988,咁我梗係話唔要啦, 呢件事我已經覺得好有問題,開張單唔清唔楚就收人錢,而我男友就傻下傻下咁俾錢...

過左成過月美亞都冇打過黎,我地間屋都裝修完,我男友又打去美亞,佢地話要再度尺,度完之後約左今日傾圖,阿BOSCO話整唔到油壓床喎"由第一次講我己經話做唔到油壓架啦!"(落單果陣唔係咁講架喎...,無油壓唔駛訂你地啦...) ,跟住我已經好唔開心喇,佢仲話"其實都係放唔常用既野者,一季開一次者"(幾時開關你咩事呢?即係要等我男友返黎先開到啦....),跟住到個C櫃,我男友話中間個空位加光管,BOSCO就話"哈!加光管!?"(好串既態度),跟住我話"俾D相人地睇啦", 其實係其他設計公司既DESIGN,佢睇完即刻冇聲出,跟住話"咁你鍾意咁做都得既",好彩我男友做定功課者,唔係又俾佢大到,跟住我已經唔想同佢講野,到最尾我男友問有冇野送,BOSCO就話"吓,你想送咩呀?"我就話送塊鏡放係門後面,BOSCO就話"我係邊度搵塊鏡俾你呀?"得,冇野講,即閃

我地提議既野樣樣都話唔得,落單果陣就乜都得,有D俾人呃既感覺,話俾朋友聽個個都話貴,"設計師"都咁既態度對客,我地個裝修師傅好佢好多啦,由落訂到CONFIRM圖足足2個月,仲要再等4個禮拜起貨,3至4個禮拜送貨,成品係點真係唔知喇,2萬幾蚊當買個教訓,鬼叫自己唔睇多幾間咩....

masalili day 1

終於可以去台中影婚紗相喇,去之前係咁搵相辦俾攝影師睇,同埋睇下有乜衫可以揀去,我地原本想訂華信航空架,起飛一個月上網訂都係HK930咋,點知起飛2個禮拜加到HK1020(好似係),跟住打去油麻地旅遊問HK1050,咁我地星期六下晝咪去分行都度訂,啦,點知話機票部收左工要星期一先問到喎,跟住去永安問要HK1260,咁咪等星期一落油麻地度訂啦,點知佢話要HK1350,跟住又問返永安,點知佢話平機位冇晒,要2千蚊先有位喎,唯有又打去油麻地機票部問啦,跟住佢又話HK1350都冇喇,問我地會唔會考慮香港快運,HK1440,不過就12點機,下晝2點幾返黎,我地驚連呢間都冇埋,所以電話BOOK左,5點再去分行交錢,一人貴左四舊水呀!!估唔到台中D機位都咁搶手.....

就係咁我地就坐香港快運去台中喇~

朝早9點半去到機場,去Terminal 2 check in,再去Terminal 1中華旅行社攞網上預約左既VISA,食完早餐已經有得攞

 

幾好味既飛機餐,不過鹹左D~

係台中機場跑道去落機途中見到2架戰機~

終於到左好細既台中機場,好搞笑係玻璃門行入去已經係入境大堂,得3條隊過關,2條台灣護照排晒長龍,外國護照得幾個人,所以好快就過左關~

 

行出機場轉右坐69號巴士去朝馬轉的士去黎客商旅check in,由上車到落車都係得4個乘客,車費一人NT24,車程半個鐘,轉的士去黎客就NT95

check完in,就去左福星路間三商巧福食牛肉面,不過個湯有D怪,食左半碗就冇食,食完就截的士去masalili試衫,架的士有GPS,好勁,車費要NT160,三個字就到~

 

去到masalili,已經5點3,遲左3個字,有位小姐帶我地去頂樓揀晚裝,我俾左D相佢睇,點知佢話有一半都出左街...,oh no,有件深藍色一層層既晚裝好靚架,咁都俾人揀埋....我地影2個package,可以揀7套衫,我已經諗好要3套婚紗,4套晚裝,跟住果位小姐幫我搵其他有既衫,我地就係3排晚裝度揀,有2排係外景既,1排就內景既,試左10幾套,終於揀好,原來已經試左個半鐘...跟住果位小姐帶我地行落一層揀婚紗,試左5,6件已經揀好,果位小姐仲問我駛唔駛再揀其他,我話唔駛喇,因為我已經有D攰,同埋3件都幾好,唔駛再轉....跟住我地去左隔離既mos burger食野,等Roger返黎溝通

食完Roger都未番,Sunny小姐同我地講解package,由於我地參加左個網上活動,所以有張NT3600coupon,佢建議我地加NT2400 UPGRADE2本15寸相簿做複合本,我地再加20張相(@NT760,10張有8折),跟住我地俾左60%錢,因為唔想影相果2日帶咁多錢出街,傾好之後,等左陣Roger就出現喇,佢又黑又瘦,都唔似徐克既,我地俾左我地份功課俾佢睇,佢睇完已經知我地想要既野,佢仲認到我地搵既相有好多都係佢影架,哈哈

跟住佢地幫我地CALL的士返酒店,我地叫司機係逢甲夜市停車,行左一個鐘就返酒店早抖

 

花球到手

其實6月尾已經攞左花球喇,不過係台中返黎都好忙,所以冇時間POST出黎,都好靚架,不過新郎個襟花就冇用過