入到房見到幾個媽咪等緊生, 見佢地個樣好似好痛咁, 姑娘話如果痛就深呼吸, 其實我都係隔10分鐘左右先痛一次, 好似肚痛咁, check 左1個鐘左右就過左南九產前房, 過左去南九開始痛得疏左, 有時一個鐘一次, 有時半個鐘一次, 痛左都唔多覺 , 同房仲有幾個大陸口音既媽咪係咁講電話, 晏晝探病, 隔離床探病個阿姐講足一個鐘, 搞到無得訓, 跟住隔離床又駁機聽bb心跳, 仲聽到隔離房有媽咪呻吟, 係咁嗌好痛, 下晝姑娘話有得轉單人房, 但我痛得咁疏可能唔駛留院, 要等醫生巡房先決定, 等到醫生巡房, 我問醫生有無得出院, 醫生話留院觀察一晚好d, 姑娘問我仲轉唔轉房, 我話轉, 起碼訓得舒服d
間唔中痛下痛到1點左右開始十五分鐘痛一次, 2-4點6-8分鐘痛一次, 中間有姑娘巡房, 我話痛得密左, 姑娘話痛咪好羅, 要痛到2-3分鐘一次先禁鐘, 5點開始就5分鐘痛一次, 痛醒又恰著, 尾龍骨越黎越痛, 初頭坐梳化都好少少, 後尾頂唔順返床典下典下, 一痛就好似蝦米咁訓係床, 隻手拉住床圍, 仲好似急大便, 走去toilet又痾唔出, 痛左9個字頂唔順禁鐘, 我話尾龍骨好痛, 姑娘話可能係bb壓到, 我問姑娘有無得打止痛針, 佢話要開到2-3度先有得打, 我又問有無止痛葯, 佢又話無, 咁我話可以做d乜, 佢話搵個舒服既位置休息, 但我點訓都咁痛..........
痛下恰下到6點幾, 急大便到好似要衝出黎咁, 完全控制唔到, 痛到無停過, 一味快吸快呼, 於是又禁鐘, 姑娘幫我檢查, 佢話係bb個頭 , 仲開到4-5度, 叫我通知老公陪產, 我心諗終於生得喇, 轉頭助理接我過產房, 我話想打電話俾老公, 佢地話會借電話俾我打, 產房唔開得電話, 我碌到床邊, 尾龍骨痛到對腳好似癱左咁, 助理仲叫我襯唔痛就快d行, 我話痛到無停過, 用手搬對腳落地再慢慢行出門口坐輪椅, 帶埋m巾同尿片就過北九
我望一望阿B, 聽到阿B喊, 好開心不過無喊出黎, 可能我又攰又餓, 仲話咁細粒既, 姑娘話唔算細粒架喇, 有3.67KG, 阿B清潔完就放係我肚上面, 佢係度食手指, 姑娘話佢隻腳同PATPAT都有胎痣, 唔驚認唔到, 坐左陣覺得佢好重下, 叫爸爸抱, 姑娘幫我地影全家福, 老公就出去等, 跟住見到條臍帶好似手臂咁長, 血淋淋, 望一望又擰咩面, 又幫我推胎盤, 跟住姑娘幫我聯針, 我係咁索笑氣, 姑娘問我係咪覺得痛, 我話唔係, 不過索左好訓D, 佢話唔好索咁多, 好易頭暈作嘔, 雖然打左止痛針, 但聯到外面都有少少痛, 搞掂晒阿B就訓係我隔離推返房, D助理見到我仲話今朝先推我入去, 咁叻咁快搞掂, 我都估唔到咁快, 全靠阿B自己衝唔黎, 如果唔係真係無力生
因為吊住鹽水加宮縮葯, 要6-8個鐘後先落得床, 食完老公買既早餐, 老公陪多我一陣就走, 助理幫我著網褲同換M巾, 去小便用沖洗瓶傷口都有D拿, 隔左陣姑娘就抱阿B黎食人奶, 到夜晚就推阿B俾我湊
跟住幾日都係食, 餵奶, 醫生巡房, 訓, 阿B出世第二日開始無便便, 姑娘要我補奶粉俾佢食, 第四日終於有便便, 姑娘話幫佢按下肚就有
日日都無覺好訓, 訓到腰又痛, 頸又痛, 試過餵完奶, 換完片, 抹完眼搞到半夜4點半, 訓到5點俾助理叫醒, 原來阿B又係度喊, 助理叫我快D餵佢
有時要上產後護理, 又去聽姑娘教點餵人奶同沖涼
原本住4日就可以出院, 不過老公唔得閒, 所以住多晚, 臨出院果晚, 阿B嘔奶, 同佢攞多張包被墊下, 過多幾個鐘就賴屎, 仲整污糟件衫, 又搞到4點幾先有得訓
住左5日要走, 有d唔捨得添, 姑娘同助理都好好人, 餵奶有問題都好幫手, 呢幾日雖然辛苦, 但都算開心~
