38 wk 第六次廣華產檢+私家產檢

今次約左睇10點幾, 老公今日放假陪我睇醫生, 等左4個字就量血壓同驗小便, 自己走去磅重, 原來無重到, 等左4個字有得見醫生, 一入去就問bb有無郁, 同埋上次b鍊報

告正常, 聽完心跳, 醫生就摸下肚, 用軟尺度size, 姑娘話如果阿b 12個鐘郁少過10次就要入醫院, 攞埋到診紙就出去等覆診紙, 下次覆診差唔多2個禮拜之後,  跟住就行

過去睇私家, 上到去有對40幾歲既夫婦係度等緊, 初頭以為個女人黎睇婦科, 佢老公又無陪佢入去見醫生, 點知見佢出黎攞住張超聲波既相, 仲問姑娘點book醫院, 先知

原來啱啱有左, 我諗個女人差唔多45歲, 咁高齡真係幾危險........

王醫生度完頭圍都啱標準, 度肚腩果陣有成41week咁大, 醫生都唔係好信, 度多次真係41week大, 我都有d嚇親, 大脾又係41week大, 阿b有成7.4磅, 我都無重過, 點

解佢會重左咁多架???

醫生話下個禮拜生左梗係好, 如果過多2個禮拜就過8磅, 再唔出世邁向9磅, 嚇到我好鬼驚, 我唔想開刀羅................

醫生叫我食少d甜野, 食少d野, 行多d, 希望阿b唔好再肥落去啦~

又問醫生阿b郁少幾多先入醫院, 醫生話4-5個鐘郁少過十次就要入醫院

老公仲話我食埋d雪糕同糖水搞到阿b咁肥, 都係一個禮拜食一次者, 有無肥得咁快呀??

上次阿b重得慢左又話我刻薄阿b, 今次又話我亂食野, 乜都佢講晒, 估唔到臨生都要無啖好食, 希望阿b快d出世啦~

早教第一回-淘~黑點卡

之前聽講座話俾bb睇黑點卡可以刺激bb腦部發展, 所以放產假前要淘定黑點卡, 呢2套卡都要50幾蚊人民幣, 估唔到黑點卡咁大張, 仲送埋杜曼大全碟, 不過仲未詳細睇, 等阿b滿月就開始睇黑點卡, 第一日由一個黑點開始睇, 一日睇幾次, 第二日換第二張, 睇足一個禮拜, 再由一點重覆開始睇, 睇到三個禮拜, 唔知我地堅唔堅持到, 同埋阿b睬唔睬我地呢?

之前係填左d資料俾迪士尼美語, 唔知點解打俾老公話約做demo , 我老公又應承佢喎, 星期日一早就上黎, 見到有個15個月bb 已經識讀到k, 仲識得認字, 一,二歲都識簡單對答, 套教材都幾好既, 成日都話要俾機會bb, 俾最好既野俾bb, 要行出第一步, 就係要買呢套野, 佢介紹俾我地個plan 係4萬幾同6萬幾, 介紹完問我地覺得套野好唔好, 仲叫我地揀禮物, 乜我有話join咩???

跟住開始轟炸我地, 不斷重覆"俾機會bb, 俾最好既野俾bb, 要行出第一步, 就係要買呢套野", join 左又有專人上黎教你點用, 又有活動join, 不過唔係全部唔駛錢, 買左連playgroup 同nursery 都唔駛上, 係貴d, 但值得, 又有得做分期, 每個月供幾千蚊者................

跟住又同我講, 媽咪想買, 爸爸錫媽咪就會俾錢, 但幾萬蚊買套教材真係要考慮下羅,  而且又無睇過其他教材, 阿b表姐又有english time 俾阿b, 之前趙sir 講過迪士尼美語係美國口音, 唔係幾啱小朋友, 所以咪話考慮下先覆佢, 點知佢仲叫我簽份合約, 話有幾日冷靜期可以cancel, 我梗係唔簽啦, 都未諗清楚, 結果老公起身準備送客先肯走, 搞左成2個幾鐘, 真係多得老公唔少.............

不過早d俾阿b學英文都好既, 等佢學多d字, 入幼稚園輕鬆d, 搞完黑點卡就要開始早教第二回~

清胎毒

8個月開始就一日一匙黑芝麻粉撈麥皮食, 一個禮拜食一,兩次腐竹雞蛋糖水

就黎9個月就煲白蓮鬚 ,奶奶8個月已經買左白蓮鬚叫我飲, 仲話佢仲緊張過我喎, 有幾包萄萄乾問佢都唔知係乜, 我都唔想咁早飲, 始終大肚婆食中葯有d戒心, 尋晚的起心肝煲黎試下, 聞下有d葯材味, 白蓮鬚+萄萄乾洗一洗就煲, 煲煲下d中葯味仲勁, 煲到一半加冰糖, 差唔多9個字先熄火, 飲落苦苦地, 雖然加左冰糖, 諗起好耐之前食中葯調理身體, 飲二啖就要食山楂餅, 呢碗好少少, 起碼入口甜甜地, 但就黎吞落肚就有d甘苦味, 咁細碗飲左差唔多半個鐘先飲完

希望真係易生d啦~

35 wk 第五次廣華產檢+私家產檢+又上護協

上星期五又返廣華產檢, 早左2個字到, 等2個字就有得量血壓 , 量完血壓又坐係附近等睇醫生, 今次又無叫我磅重, 我見姐姐叫十個量血壓, 6.7個都要報磅數, 點解我唔駛呢?唔通我唔似會超重?

等多半個鐘就有得睇醫生, 今次都係女醫生, 入到去話要驗埋B型鏈球菌 , 姑娘用棉花棒係陰道同肛門攞d分泌物, 陰道果下有d唔舒服, 肛門果下點一點就搞掂

聽完阿b心跳, 就到陳醫生摸肚, 今次摸勻上下左右, 按肚底果下有d痛, 醫生一摸話我個肚好實, 我問咁好定唔好, 醫生話好, 因為阿b夠重, 即刻開心晒~

醫生話血色素升到10度, 要keep住食鐵丸同葉酸, 如果唔係驚我生完要輸血~

攞完到診紙就走得, 出番去等覆診紙, 今次好快, 幾分鐘就有覆診紙, 唔駛一個鐘就走得, 霸定位等老公食lunch~

下次覆診已經38week, 睇完醫生返多日先放產假~

食完飯未夠鐘睇私家, 過左永安睇毛巾, 見amor 果隻2面毛巾+紗巾幾好幾舒服, $139/條, 又有9折, 但得番黃色, 記得上次去護協見過, 所以又行過去護協睇下

想買思思樂隻patpat 棉又無貨, amor 條毛巾賣$108, 都係得一條藍色, 老公話買多2條, 3條存貨都買晒, 買埋個奶粉格, $10換左對襪仔

買完又行去安記買葯材, 帶埋陪月個list 去執, 陳皮要成$450/斤, 真係好貴, 但隔住膠袋都有d陳皮味, 全部埋單要七百幾蚊都幾貴, 無計, 坐月要食好d~

買完野又去睇私家, 阿b對腳又長左, 大左4week, 王醫生話似我, 肚腩頭圍又啱番week數, 醫生話阿b已經足磅, 我問醫生如果阿b又大快左駛唔駛提早預產期, 醫生話唔駛提早, 希望阿b生生性性等我放產假先出黎啦~

儲滿21次讓座記錄

襯仲記得讓座記錄, 要記低d好人好事, 我個肚比較細, 所以到7個月先有人讓座, 多謝讓座過俾我既人~

第一次: 返工時間/ 20-30歲男人
第二次: 放工時間/ 30-35歲女人
第三次: 放工時間/ 35-40歲女人
第四次: 返工時間/ 35-40歲女人
第五次: 放假/ 35-40歲女自由行
第六次: 返工時間/ 35-40歲女人
第七次: 放工時間/ 40-50歲男人
第八次: 返工時間/ 35-40歲女人
第九次: 放工時間/ 30-35歲女人
第十次: 放工時間/ 35-40歲男人
第十一次: 返工時間/ 25-30歲女人
第十二次: 放工時間/ 40-50歲男人
第十三次: 放工時間/ 25-30歲女人
第十四次: 返工時間/ 40-45歲男人
第十五次: 放工時間/ 40-50歲男人
第十六次: 返工時間/ 40-50歲男人(對腳有d行動不便, 搞到我有d唔好意思)
第十七次: 返工時間/ 25-30歲女人
第十八次: 返工時間/ 35-40歲男人
第十九次: 放工時間/ 25-30歲男人
第二十次: 放工時間/ 25-30歲女人
第二十一次: 返工時間/ 25-30歲女人

根據我既經驗, 以下幾類人係唔會讓座既:
-阿姐
-拎住電話或禁禁禁既人
-打緊機既人
-90後

最嬲果次係我企係d位前面,有2母女攝埋黎, 咁啱有2個人起身, 2母女仲要同我爭位坐,但其實佢地坐4個站羅