小王子7個月大喇~

又大一個月, 時間過得真係快, 過多5個月小王子就一歲喇~
小王子出緊一隻牙仔, 可以成隻手放入口, 食食下奶都要放隻手指食下, 有時仲咬媽媽, 如果佢出多幾隻牙仔會唔會咬到我流血呢???

上個月去健康院, 有18磅, 70cm高, 姑娘同佢做d測試, 睇下會唔會主動攞玩具, 最搞笑姑娘同小王子講野, 小王子係度拍手, 姑娘仲讚佢叻, 姑娘話要訓練小王子坐多d, 我話小王子鍾意企多過坐, 跟住姑娘扶住小王子企, 小王子又係度彈下彈下, 姑娘讚佢好腳力~

唔知點解果日健康院好多人, 小王子等打針等到訓著左, 訓訓下俾姑娘打左支13價, 姑娘勁快手, 我想影相, 佢已經打完, 小王子準備大喊點知已經打完, 佢好無奈繼續ee娥娥

呢支針好勁, 小王子未試過燒一晚加半日, 我同老公差唔多成晚無訓, 隔幾個鐘要探熱, 小王子又訓唔到, 隔一陣又醒, 喊到好慘, 最弊唔肯食藥, 要夾硬餵至得, 見小王子咁辛苦真係心痛......

小王子有d厭凍奶, 99話佢食餐奶都扭身扭細, 又食得少, 奇怪夜晚爸爸餵, 食完4安訓左陣再食3安, 99話小王子恰佢, 但小王子依然好鍾意埋身餵, 夜晚唔埋身訓唔著, 仲未戒到夜奶勁鍾意食粥仔, 99話佢搶住食, 一日食2餐粥, 試過三文魚,番薯, 紅蘿蔔, 南瓜, 有次99煲魚粥塊面紅左, 可能敏感, 跟住無再煲魚粥, 好想試菜心同菠菜, 要等媽媽放假先試得

見我地食蘋果望住晒, 俾小王子試下又係咁lam, 於是磨d蘋果蓉俾佢食, 點知一路食一路吐番出黎, 食左幾啖仲發脾氣......

影相好似好乖, 其實好曳, 有時一放低係墊就喊, 要人抱, 仲要企住抱, 唔可以坐住抱, 沖涼換片換衫係咁反黎反去, 一係young上床頭, 依家識嗲人, 爸爸放工番黎一路望住笑, 入房換衫即刻扮喊, 爸爸抱住見到媽媽番又望住媽媽笑, 媽媽唔抱佢又伸晒手扮喊, 嫲嫲帶佢出街坐bb車唔開心, 唔出聲又唔笑, 如果係我地帶佢出街坐bb車坐低都要掙扎, 想衝出黎咁, 所以我地帶佢出街都係用揹帶, 買左個hipseat 睇左好唔好用

出街多左人撩小王子玩, 可能見佢個樣傻下傻下, 仲未驚生保人

小王子:媽咪,我鍾意食market O 多d

第一次坐船, 開船即刻訓著, 落船即刻醒番, 明明好眼訓, 出街幾個鐘都唔肯訓, 回程上左船未開船已經訓著左

一淘再淘......仲有3日

淘寶11月11日又有特價,雖然買左唔少衫俾小王子,但搵起衫上黎硬係唔夠, 其實買小王子d衫都好煩, 買啱size, 著得幾個月, 買大d依家又唔係幾啱著, 仲要俾99話買到咁大, 著到個仔咁, 今次咁平, 買番差唔多size, 唔買好似對唔住自己

我想買波點果套, 但老公話唔靚, 所以買隔離3套, 又想買褲俾小王子, 但仲諗緊買厚定薄, 高腰定普通褲款

 



呢個淨色系列幾順眼, 有minimoto feel, 淨色衫都係rmb20件, 買多2件做底衫都好

件褸都係rmb44.5, 太抵喇, 我老公成日話今個冬天凍, 驚小王子唔夠衫, 呢件褸入面係珊瑚絨, 夠晒暖, 夾棉連身衫夠厚, 遲d凍d小王子出街可以著

今個星期六晚要完成mission!

又淘~小王子冬天衫

之前淘過D長襪俾小王子, 點知想搵出黎著先發覺唔見左, 問我工人放左係邊佢話無見過, 佢日日洗,褶,執小王子D衫都可以唔記得D衫, 最攪笑有次小王子對黃色手套仔唔見左, 問佢係邊佢話做咁耐都無見過, 我嬲爆搵番D相原來2日前先用完, 隔幾日用一次, 又洗又掛都可以唔記得, 攞件新外套俾佢洗, 洗完唔見左粒鈕, 又唔關佢事, 佢話根本無左粒鈕架喎, 好彩我有影相佢先無聲出者



搞到我又要淘d長襪俾小王子, 順手又淘下d冬天衫, 因為要趕中銀減rmb50個promotiom, 求其買番上次果間算數

呢件rmb73, 係counter見到幾靚又幾舒服, 所以買俾小王子

99話小王子無底衫,買套薄薄地打底 ,件衫rmb27, 條褲rmb24

 

呢套老公話要買, 灰色都幾靚,件衫rmb37, 條褲rmb35

淘~小王子冬天衫

 又要幫小王子淘d冬天衫, 俾晒錢先發覺中銀卡第一次簽rmb300減rmb50, 激死我,點解唔早幾日出?蝕晒......

買左老虎同熊貓裝俾小王子著, 都好厚下, 十零度都啱著

minimoto雙面套裝, 呢套已經係最大size, 唔知下年仲啱唔啱著, 不過質地好舒服

第一次買呢隻牌子, 平minimoto一半, 質地無咁滑, 但都算舒服, 著得過, 又夠厚, 買一套仲送個膠袋,雖然無乜用, HEHE

上次買minimoto果間d褲size唔齊, 今次見第二間有特價配番d褲, 上次買1-2歲既size, 小王子依家著都係大少少, 所以今次買褲買大一個size, 點知勁長, 可能幼稚園都啱著, 行過MINIMOTO COUNTER 三層夾絲款貴橫條款差唔多一倍, 但淘寶價錢一樣, 買三層夾絲抵好多

特價RMB28, 順手買埋俾小王子冬天用, 換片無咁凍

小王子6個月大喇~

小王子半歲大喇, 開始食米糊, 食過米餅同牙仔餅, 小王子like米餅多d,勉強lam到一條米餅, 食食下牙仔餅一手fing落地,嘥媽媽錢........

好多人話bb半歲之前好少會病, 不過小王子已經睇左幾次醫生, 上個禮拜同媽媽一齊咳咳, 次次餵葯都bu出黎, 跟住就喊, 隔左陣餵米糊, 一手推開個碗落地, 唔知係咪有陰影, 餵親新野都拿埋口面

打六合一針, 喊得好大聲,好彩打完就唔喊

小王子依家仲好鍾意飲媽媽奶, 仲大食左添, 不過媽媽病病地, 要泵密d先追到奶

唔鍾意坐,鍾意企, 睇電視先正經坐一陣, 仲未識爬, 鍾意打人手板,扯頭髮同眼鏡, 開始唔鍾意坐bb車, 要用揹帶

食手食到之之聲

小王子5個月大喇!

小王子5個月大, 依家每日食7-8餐媽媽奶, 每餐都係3安, 飲緊奶見到媽媽就唔食, 等媽媽埋身餵, 3-4次埋身餵, 次次都要一喊即餵, 知佢扮野同佢笑, 小王子又忍唔住笑, 又笑又喊, 俾佢激死, 8,9點食完奶就訓, 訓到12點醒又食多次奶先訓, 一晚醒2,3次, 仲未戒到夜奶

小王子仲未厭奶, 不過我覺得小王子ready 食糊仔喇, 成日流口水, 遞野食埋佢口會擘大口, 見我地食野咀郁郁, 今個禮拜俾佢試下食米糊, 好期待小王子有乜反應

每個月都學到新野,不過小王子好暴力, 日日同佢沖涼要同佢博鬥, 捽眼, 扯耳仔,打肚腩, 爪肚, 食拳頭, 著著下衫又反身, 隻手攞到乜就扯住唔放, 坐人大脾就打人手板,對腳係咁YOUNG, 我哄埋D就扯我頭髮, 我同老公都覺得佢大個D會仲曳..........

小王子多左野講, 成日ba ba ba, 媽麻講左幾次, 教佢講媽媽都係講 ba ba, 依家無睇黑點卡,睇輪廓卡, 次次都睇到好開心, 有時又玩下毛公仔, 依家會主動攞玩具玩, 不過跟住就放入口

呢排最鍾意捉腳, 就黎食腳趾

食糊準備之護協大出血

小王子下個月就半歲大, 要食糊仔喇,所以出護協買定D用具, 好耐無上去,好似多左野賣, 坐緊月果陣叫老公上去買乳墊, 咁啱濕紙巾用完,叫佢去葯房格價先買, 佢無去格價就係護協托2包HUGGIES濕紙巾返黎, 要成$40幾蚊包, 點知我去開葯房見到只賣$32, 貴成$10幾蚊包, 仲要托返黎, 激死我, 所以我上護協唔會買HUGGIES D野, 其他野上網格下價錢先買,費時買貴左又要托返黎, 今次上一上去又唔見$600蚊~

硏磨器$152, 希望好用

餐具SET $168

圍兜同千色店一樣價錢

又淘bb用品

淘小王子d野真係無窮無盡, 依家成日反身,原本隻蓆都唔夠大比俾反, 所以買張大既遊戲墊俾佢, minimoto張蓆冇上次買baby leaf 果張咁滑, 不過baby leaf無出遊戲墊,所以先買minimoto,淨係運費都幾十蚊人仔, 圍番大概香港買既8折

有新蓆玩,開心得佢呢~

買定d保暖內衣,每件唔駛40蚊

見有折又買埋較剪同襪仔,較剪唔駛十蚊,唔覺唔覺買左成打襪俾小王子..........

小王子無外套買定2件,一件都係30幾蚊人仔

小王仔專用垃圾桶, 60蚊人仔,個樣好靚,但實際好鐵皮..........

下次又要買定冬天衫俾小王子喇~

小王子4個月大喇~

話咁快小王子就4個月大,前排小王子唔係幾舒服, 成日嘔奶, 食幾多嘔幾多, 有次仲噴奶, 噴完成身軟晒標冷汗, 嚇到第二日帶佢去睇醫生, 醫生話佢有鼻塞, 可能用口吸氣多, 吸埋d風落肚, 又多痰,搞到嘔奶, 問醫生點解會噴奶, 醫生話bb個胃好細, 風一多就噴出黎, 不過衰b唔肯食葯, 餵完葯一路喊, 一路吐出黎, 好彩過幾日都好番~

上個禮拜同佢去健康院, 有7.53kg重, 67cm高, 姑娘幫佢做d簡單檢查,  姑娘話我抱小王子係bb既抱法, 可以叉佢格啦底抱,等佢練下頸力, 坐係大人大脾扶佢條腰, 我都有d驚小王子條頸唔夠力, 不過都會托少d頸, 打埋13價肺鏈針,今次好叻, 喊左陣, 出房就收聲

小王子終於識反身喇, 之前反到一半個頭重得滯, 反唔到, 依家識轉個頭先, 然後先反身, 依家放佢落床就反, 不過反得好論盡, 反完身個身會彈一彈, 隻手會夾係肚腩度, 自己彈下彈下抽隻手出黎, 有時見佢彈得咁辛苦幫佢抽番隻手出黎, 反完身係度笑, 個頭左右轉, 想再反身不過唔成功, 好似游緊乾水咁

有次半夜爸爸起身發覺小王子打橫訓係bb床, 整到個頭, 但工人都無發覺, 所以依家同我地同床訓, 可以睇實d, 又驚佢半夜反身, 初頭同床都驚驚地, 有次唔小心張被遮住小王子個頭, 小王子即刻叫, 我先知遮度佢, 依家放佢個頭同我地平排, 咁就安全d, 小王子依家大字形咁訓, 有時都驚壓到佢隻手, 所以我同爸爸會互相監察

小王子真係好反訓, 一腳就踢開張被, 個頭越訓越側, 變左打斜訓, 有次俾佢踢醒, 不過一齊訓好sweet, 半夜餵奶唔駛起身

依家識僚人玩, 唔理佢會大叫, 同佢玩下波就係度笑, 同佢唱下歌就笑到騎騎聲,同佢出街食野,餐廳d人都對我地好d, 俾d無咁凍, 無咁嘈, 闊d既位俾我地, 去茶餐廳酒樓d阿哥阿姐都僚佢玩, 不過成日問係咪女仔?? 連樓下實q都以為佢係girl, 乜小王子似女仔咩?可能見佢白淨就以為係女仔, 似媽媽無辦法, 哈哈
睇電視最開心~

試坐bumboo seat,  夾硬放佢大脾落去, 個頭係咁耷落黎,  爸爸話驚抽唔番出黎, 哈哈

奶媽唔易做

唔覺唔覺就餵左媽媽奶4個月, 估唔到仲堅持到依家, 坐月果陣D奶都唔多, 泵出黎通常得2安,頂多3安, 唔夠小王子食要補幾餐奶粉,坐完月通常埋身餵, 有時要訓覺同出街先餵奶粉, 返工前一個月已經開始儲冰奶,驚我返工小王子會無得食媽媽奶, 點知小王子唔鐘意食冰奶, 要一份冰奶溝3份凍奶先肯食, 放完產假返工, 每日泵4次,返工前一次,返緊工2次, 放工返屋企一次, 奶量每次都係3安咁上下, 小王子每日要補1,2餐奶粉

小王子3個月大既時候, 奇蹟就出現喇, 果朝返工前飲左一大杯豆漿, lunch 泵奶竟然泵到6安, 下晝再泵都有5安, 雖然唔知關唔關豆漿事, 但依家隔幾日都飲一次, 豆漿涼得滯又飲下黑豆漿, 得閒又食下雪糕, 奶量都keep到, 依家小王子都算全媽媽奶baby, 小王子又細食, 凍奶都食唔晒, 有時都要倒, 仲有十幾包冰包存貨, 可能最後都要黎敷面同沖涼, 真係唔敢飲自己d奶, 用黎敷面都聞到蘇味 冰奶肯定勁蘇~

初頭諗住餵六個月就唔餵, 依家小王子鍾意食媽媽奶, 餵到都想餵落去, 希望餵到一歲, 雖然出街有d麻煩, 帶小王子出去又要搵育嬰室餵奶, 唔帶小王子出去就唔可以去咁耐街, 一來谷奶, 二來又驚小王子無奶食, 有時谷谷地奶又泵唔清, 差唔多lunch time都用晒黎泵奶, 有次唔記得帶泵要請假返屋企泵奶, 泵左成個鐘先泵清

不過諗起小王子食完媽媽奶就訓著個樣, 有幾辛苦都唔記得晒喇~

每日帶凍奶番屋企成日驚冰袋唔夠凍, 遲返屋企d奶好易壞, 上淘寶search下, 見百零蚊一個, 有2塊藍冰, 2個小冰袋, 又有得放拉鍊升高, 第時唔泵奶都可以雪野飲, d comment 都唔錯,所以淘左個冰袋返黎, 叫做背奶包, 個名又幾啱聽~

用左一個禮拜返到屋企都keep到凍, 係舊藍冰重d, 依家唔驚遲返屋企, 放奶入去d位都fit, 唔驚倒寫, 依家係我泵奶好幫手

淘~再淘BB衫

今次淘既衫,得2件小王子依家啱著, 灰色熊貓同水手果件想買好耐,見有特價買埋, 不過水手果件無睇相咁靚, 星星恤衫同吊帶褲都好cute,不過都要下年先啱著

呢幾件rmb10件,算係咁啦, 平平地等小王子平時著下~

小王子的100天&101天

小王子100天都係同佢影下相, 著番件波衫係屋企威下

101日著番件飲衫出去食飯, 仲諗住影多D全家福,點知奶奶係咁影都係得1張見得人, 叫工人幫手影, 禁制禁到部機都郁埋, 影唔到,嗚嗚...........

返屋企再影,小王子已經眼訓喇,, 想影多D相都唔得

100日大, 小王子實淨左, 抱佢唔會變蝦米, 爸爸話佢曳左, 我返工佢成朝係度扭計唔肯食奶, 要人抱住,放低就喊, 但我番黎又好乖喎, 同佢落街坐車都無嘈, 可能係蝦爸爸喇~