歐洲11天團-Day 8(Part 1)

第8天 巴黎(法國)->市內觀光->蒙瑪特山->塞納河遊船河
●協和廣場Concorde~法國大革命期間，曾為斷頭臺之地。
●拿破崙墓Napoleons Tomb~巍峨的大金頂，其閃亮的光芒遠遠看到。
●香榭麗舍大道Champs Elysees~世界聞名，是遊人必到之處。
●凱旋門Arc de Triomphe~拿破崙盛世的代表象徵，是為了紀念拿破崙一連
串的軍事勝利而建立，讓拿破崙軍隊凱旋歸來在此接受歡迎。
●亞歷山大3 世橋Alexander bridge ~有世界最美的大橋之稱。
●戰爭博物館廣場Hotel des Invalides~當國家元首到訪，閱兵禮廣場。
●艾菲爾鐵塔Tour Eiffel~於1889 年落成，唯當年世界第一高的建築物！
◎蒙馬特山Montmartre~巴黎唯一小山崗可俯瞰全市及著名畫家村所在。
◎特別安排塞納河遊船河
★羅浮宮博物館Palais du Louvre~詳情敬請參閱價目表。
★紅磨坊夜總會Moulin Rouge~須穿整齊服裝，詳情敬請參閱價目表。

今朝早餐都幾豐富,有番茄食,仲有蒜蓉牛油點麵包,食飽就8點半出發,今朝都好大雨,多左個導遊PETER,唔知佢係咪讀HISTORY架呢?佢D法國HISTORY真係好熟呀,今日D團友就係跟佢行羅浮宮~
第一站係協和廣場,落車15分鐘影相,領隊話條石柱係埃及搬過黎架,不過,雨一路無停過,都無乜心機研究,跟住再過戰爭博物館廣場前面既草地影相,順便影埋亞歷山大三世橋~

跟住就去艾菲爾鐵塔後面既廣場影相,D雨仲落大左,影完相件衫都濕晒....
最安慰有D黑人賣小鐵塔匙釦,估唔到咁大雨都出黎做生意,佢竟然識用廣東話講1蚊6個,我買左12個做手信~

下一站係凱旋門,影相真係好好睇,我地仲走去馬路中間影相,無遮無擋!
可惜無得行香榭麗舍大道,淨係影下條街咋....
跟住就去蒙馬特山,經過紅磨坊,附近有D雜,領隊叫我地上山果陣小心D,因為有D黑人叫你伸隻手出黎就幫你綁手繩,然後問你攞錢,我地中途都見到有個男遊客俾人綁手繩,行樓梯上山既人唔係好多,因為好多人都坐纜車,可能落雨卦~
上到山入教堂,咁啱有個團友係入口度影教堂入面,有個教堂職員就好惡咁指住不可攝影既牌,再用英文講"NO PHOTO",行左個圈就出番去影相,望到巴黎風景,不過天氣唔好,睇得唔清楚,先行完就係教堂側面去TOILET, 一人好似EURO0.2,入面個STAFF識講廣東話,去完就落番山喇~
我地行番落車既地方見到D賣紀念品既舖頭,有得賣頭先買既鐵塔匙釦,一個都要EURO0.5,小販真係平好多喎!
行到落去見到有間葯房,又睇下BIODERMA,不過貴好多呀,我買果支水份精華都係EURO10.9,但果度賣EURO16個幾,唯有行多幾間啦,因為想買多支精華呀,萬X正價都HK395啦~
齊人到11點喇,其他團友要去羅浮宮,我地都要跟住入去,再約領隊2個鐘後係度等,
終於可以有D自由時間去行街喇~
因為停左雨,我地上番羅浮宮度影相,影完就行去AGNES B總店喇~

好彩之前係GOOGLE MAP PRINT定張地圖,行左20分鐘左右就到喇~遠望見到賣豬仔腳既餐廳,隔離條街就係AGNES B總店喇~

一間賣男裝,一間賣女裝,一間賣BB衫,一間賣袋,我淨係行賣袋同女裝,兩間係打通既,一入去就見到D SALES係度傾計,仲要一人企一邊咁傾,不過都好既,唔駛有人跟住晒~

我覺得香港D款仲多D喎,果邊D款簡單D,顏色少D,又同香港差唔多價錢,想買個餃子袋,老公又話唔興啦,咁咪試下D太陽眼鏡羅,太陽眼鏡都唔算貴,有D就EURO95,有D就EURO120,全部都係大鏡膠框,不過試左幾副我都帶得唔好睇,所以都無買到,行完又番羅浮宮,經過一間賣三文治同CAKE既舖頭,買左2件試下,因為係LUNCH TIME,都有6-7個人排隊,到我地ORDER果陣,用英文同STAFF講ROYAL同OPERA,佢聽得明OPERA就攞左一件OPERA,再同佢講ROYAL,佢都聽唔明,要我指番先攞到....好彩2件都好好味!

行到番羅浮宮,個天已經藍晒,我地又影多一輪相,影到小凱旋門,D團友已經行完上黎影相,影完就落番去集合,有一個團友約左朋友敍舊,到左集合時間都未番,領隊叫我地係地庫上車先,佢繼續等個團友,個停車場好大,泊滿晒旅遊巴,我地上晒車領隊番黎話見唔到佢,打佢手提又唔通,所以送我地去食飯先,後尾個團友打番黎話去到唔見我地,約番係遊船河碼頭等,今日食飯間餐廳又係係老佛爺附近,食完又趕去碼頭遊船河~

My first staub

中秋節果日,老公話睇報紙見到我想買既STAUB 20CM都係$780,橫掂早放就去SOGO睇下,上到去有得試飲南瓜湯同試食牛腩,個姐姐話南瓜湯煲左半個鐘咋,我都想整南瓜湯好耐,呢個煲又幾方便喎,點知去到先知原來佢睇錯左,係23號先特價,不過26CM都係$1280,又幾抵喎
我都諗左陣買24CM+$1有個炒煱定係買26CM,最後買紅色26CM,不過已經無現貨喇,要訂貨,26號之前攞,有貨就CALL我,第二日已經有貨,我地星期五先去攞,已經無左加1蚊既PROMOTION,不過24CM就賣$1299,26CM無左紅色LU,CHECK完貨就要老公幫手攞番去喇,呵呵~

過2日有得煲南瓜湯喇~

歐洲11天團-Day 7

第7天 狄莊(法國)->漢斯->香檳廠Moet & Chandon->巴黎(法國)
◆漢斯Reims~法國著名的香檳酒之都，位於世界最大的香檳區內。
◎Moet & Chandon 香檳廠~自 1743 年成立，有皇室香檳的美譽。而法國
的拿破崙大帝更對此香檳尤其喜愛。
◆巴黎Paris~一個浪漫的花都，亦是世界的前衛藝術中心，而自1950 後逐漸
由傳統工業及農業社會，走向高科技及服務業。

朝早7點半落去食早餐,但係都未PREPARE 好,好在有雜菌雞絲蝴蝶粉,我食左2碟,食早餐果度見到有個水上樂園既物體,應該幾好玩,食完早餐又出酒店行下,都有D微雨

坐緊車果陣,領隊就問D自費項目,因為老公想夜遊鐵塔,所以淨係參加呢樣,一人要EURO30,其他團友都好踴躍,海鮮餐淨係得我地同幾個唔去,連紅磨坊要EURO120都有幾個參加,老公想JOIN埋羅淨宮架,不過我地計過最多得2個鐘行,肯定好趕,而且我地有半日自由行,自己去都係EURO9.5入場者,去3個鐘都得啦,所以都無JOIN~


跟住就去漢斯食LUNCH,雨一路都無停過,因為餐廳係行人專用區度,我地要落車行入去,行左5分鐘就到,食飽飽又去隔離間舖頭望下,因為有MACARON賣,跟住經過葯房,入去望下,終於見到有BIODERMA賣,其實我未用過呢隻牌子,不過真係幾平,水分精華都係EURO10.9,而且由SALZBURG開始D皮膚已經乾到甩皮,平平地買支水分精華搽下都好~

買完野就趕番出路口集合,出到去見到D團友仲等緊車,原來仲有2個團友未到,領隊去左搵佢地,等多陣就上車走人~

下一站係Moet & Chandon 香檳廠, 呢度我麻麻地,但有D團友好期待去既地方,我寧願早D入巴黎,有個靚女帶我地參觀~

講完一輪香檳廠背景就落地牢,下面涼涼地,黑媽媽,靚女講下每個位放唔同時間釀既酒

行左個圈就可以一人試飲一杯香檳,不過唔係幾啱我口味,可能我唔鍾意飲酒,飲完就行番出去賣酒既地方,一支都唔平架,有團友幫人買支都要EURO80

臨走前係門口影下相,最有興趣係門口既幾棵橙樹~

坐左2個幾鐘車,終於入到巴黎,不過都係落緊雨,經過望到凱旋門同巴黎鐵塔都好開心,希望聽日天氣會好D啦,唔係點遊船河呢?

我地食中餐果度係老佛爺條街度,不過梗係無得行啦,食完就返酒店,今晚住Marriott, 恨左好耐喇!!

不過TOILET零零舍舍係間房仔度,同洗手盆分開,有D唔方便~

果陣先8點幾,放低行李就同老公係酒店附近行下,酒店附近個地鐵站好細,行出路口個火車站就大好多,仲人來人往,火車站對面再行入去就見到PAUL,再轉彎就見到麥記同超市,不過超市都夠鐘閂門,已經唔俾人入,跟住就返酒店LU~

歐洲11天團-Day 6(Part 2)

第6天 琉森(瑞士)->鐵力士雪山(瑞士)->狄莊(法國)
◎鐵力士雪山Mt.Titlis~極受旅客喜愛的旅遊熱點，登山沿途須更換3 種不同
吊車登上一萬呎高之山峰。
◎獅子紀念碑Lion Monument~是為了紀念1792 法國大革命，保護法皇路
易16 王室而戰死的瑞士傭兵，所建的紀念碑，意在祈求世界和平。
●水塔橋Wasserturm~橋頂內壁還設置了100 多幅古畫，沿途還可欣賞描述
當年黑死病流行景像的畫作。1993 年8 月曾遭祝融肆虐，現重新修補。
●琉森湖Luzern Lake~位於琉森市傍，湖光山色，目不暇給。
◎鐘錶專賣廳Watch Shop~瑞士號稱鐘錶王國，可隨意欣賞及選購。
@瑞士雞翼香腸Swiss Lunch~特製瑞士雞翼、地道式香腸、甜品。
◆狄莊Dijon~是法國釀製葡萄酒之重鎮，每年經濟收益數十億歐元以上
@法國蝸牛France Dinner~香草焗法國蝸牛、狄莊廚師精選主菜、甜品。

等齊人就坐纜車落山,轉到最後果程纜車,排我地前面係2個外國女人,我地梗係等下架車啦,我地上完車,後面有4個印度人又係等下架,點知個工作人員竟然好惡咁鬧佢地, 話每架纜車可以坐4個人,跟住D印度人就話佢地有4個人,所以等下架車,其實果陣都唔多人,排我地前面D人都係2至3個人啦,都唔知佢鬧乜....

落番停車場又影下雪山景,跟住就出發去狄莊喇!不過要坐3個幾鐘車先到,去到狄莊仲好大雨添~
今晚住Holiday Inn Dijon, 酒店隔離就係shopping mall 有,家樂福, 玩具反斗城同麥當勞,不過我地去到果陣都差唔多收檔,想食完飯行下都唔得~
住左幾晚酒店,第一次見到有熱水壺,間房都好大,一個人訓4尺床,好舒服~

跟住落番lobby食蝸牛晚餐,食完一樣要等一輪,所以去lobby 度上網搵定巴黎半日自由行的資料,因為無printer,所以要影相
今餐唔係好飽,返房再食宵夜!

歐洲11天團- Day 6(Part 1)

第6天 琉森(瑞士)->鐵力士雪山(瑞士)->狄莊(法國)
◎鐵力士雪山Mt.Titlis~極受旅客喜愛的旅遊熱點，登山沿途須更換3 種不同
吊車登上一萬呎高之山峰。
◎獅子紀念碑Lion Monument~是為了紀念1792 法國大革命，保護法皇路
易16 王室而戰死的瑞士傭兵，所建的紀念碑，意在祈求世界和平。
●水塔橋Wasserturm~橋頂內壁還設置了100 多幅古畫，沿途還可欣賞描述
當年黑死病流行景像的畫作。1993 年8 月曾遭祝融肆虐，現重新修補。
●琉森湖Luzern Lake~位於琉森市傍，湖光山色，目不暇給。
◎鐘錶專賣廳Watch Shop~瑞士號稱鐘錶王國，可隨意欣賞及選購。
@瑞士雞翼香腸Swiss Lunch~特製瑞士雞翼、地道式香腸、甜品。
◆狄莊Dijon~是法國釀製葡萄酒之重鎮，每年經濟收益數十億歐元以上
@法國蝸牛France Dinner~香草焗法國蝸牛、狄莊廚師精選主菜、甜品。


今朝7點幾就走落去食早餐,例牌麵包,芝士 & 火腿,因為想出發之前去湖邊餵天鵝,我攞D餐紙包左3個包,食完就跑去湖邊,因為驚唔夠時間,街上無乜人,有D人踩單車返工返學,幾分鐘就到湖邊,原本想引D天鵝行上湖邊,點知原來朝早係個小市集,賣花賣菜同生果,唯有係欄杆邊餵,D天鵝真係好為食,你企係湖邊伸下手就會有幾隻天鵝拿拿聲游過黎,餵天鵝真係好好玩呀,不過D天鵝唔夠D鴨爭,俾鴨食左就頭耷耷,所以我會掟遠D等D天鵝有得食,原來3個包都唔夠玩,早知攞多幾個啦~

餵完天鵝就返酒店出車去獅子紀念碑,賣紀念品D舖頭都未開,呢隻肥猫都未訓醒,去到獅子紀念碑原來係一個公園,一眼睇晒,不過又雕得幾靚,領隊話個雕刻家受唔住俾人批評佢雕條獅子尾太長而鬱鬱而終喎....
好在得我地一團,任影唔嬲,走果陣第二批人就到喇~

影完相就去寶齊萊,領隊話2個鐘後係門口停車場等,我地上左3樓睇下D紀念品,落番地庫去完TOILET就去行超市MIGROS, 係寶齊萊門口出黎左手邊有間賣MACARONS既舖頭,隔離既小路行入去轉右就見到MIGROS個牌喇,真係好易搵呀!!

入到去就見到成排朱古力,一排都係個幾2蚊法郎,小禮盒裝都係7-8蚊法郎,我地掃左一籃做手信同自己食,跟住就係地庫行,一支檸茶都係個幾法郎咋,真係好抵~~
我仲買左香草同蒜粉都係2蚊法郎度,但係SIZE係百X既DOUBLE,買左包RISOTTO又係2蚊法郎
排隊俾錢果陣,個收銀係咁講野,我都唔知佢講乜,我地將個籃放上COUNTER,佢又講一輪,跟住係我地個籃度攞一樣出黎再推開我地個籃,我先知佢要我地逐樣野攞出黎,再自己放番好個籃,我心諗,係度做收銀都幾嘆喎,同自助收銀有乜分別呢,後面個阿婆仲俾個好唔耐煩既樣我睇羅
即刻唔開心啦,瑞士人係我心目中既地位即時打個折扣.....
好在見到隔離個COUNTER有膠袋攞,攞番幾個補番.....

買完手信係MIGROS附近行下,睇下有塔橋PATTERN既軍刀,最後都係寶齊萊買,因為有得刻名,買完要等半個鐘先有得攞,所以又走去湖邊餵天鵝,係意大利食早餐攞既獨立包裝牛角包,湖既另一邊仲見到雪山架~

攞完軍刀就上車去鐵力士雪山Mt.Titlis喇!
咁大個人都未見過雪,所以好興奮~
不過一落車就聞到牛屎味,但周圍又唔見牛喎, 領隊幫我地買飛,跟住就排隊上第一程纜車,有D海洋公園FEEL,領隊話第一次開門唔好落車,第二次先落,我就加多件冷衫~

坐坐下就聽到D牛鈴聲,原來下面有好多牛,不過隻隻都好瘦....

轉第二次纜車就開始見到雪,仲越上越高,最後果程係360度纜車,好似可以企到80人,好逼,不過幾好玩,一路轉一路影相

上到去真係幾凍下,領隊叫我地行慢D,深呼吸,因為D空氣薄左,跟住就去食LUNCH

D雞翼又幾好食,碟炒粉絲都好食,我都食左好多,唔知係咪老細係泰國人呢,枱面有泰式雞醬,炒粉絲都有D泰式FEEL~
食完飯就解散,有一個鐘左右出天台影下相,出到去真係好凍呀,我又無帶手襪,對手成日插袋,不過真係好靚呀,啱晒一掃全景,雪地真係幾跣,行幾步就跣一跣,有D團友行上上面果層雪坡,不過我地唔夠衫,行唔到咁遠,影一陣相就行返去,老公話佢對手凍到僵晒,哈哈~

影完相就落返去食MOVENPICK,隔離枱有幾個中國女人係度開杯麵,仲以為佢地咁醒帶埋熱水上黎,點知其中一個就問賣雪糕個哥哥借熱水,哥哥梗係唔肯啦,個女人問熱水要幾錢,哥哥話10蚊,個女人返去同佢D FRIEND傾左一輪就執野走,臨走仲要同哥哥講" I HATE YOU!"...................

食完又落番去冰洞行下,仲有得揀國歌聽~

歐洲11天團-Day 5

第5天 薩爾斯堡(奧地利)->新天鵝堡-富森(德國)->華多茲(列支登士敦)
->琉森(瑞士)

●新天鵝堡Neuschwanstein~ 內斯雲士坦古堡，堡主以個人喜愛建設出白
色浪漫的童話世界，加上用天鵝為主題。(須自費登山約9 歐元)
◆華多茲Vaduz~列支登士敦的首都，位於瑞士境內的小國，有郵票小國之稱。
◆琉森Luzerne~遊客必到的瑞士旅遊城市，湖光山色，像人間仙境般。


今朝早餐真係正,有沙律同生果,仲有10零款茶包任揀,食得最耐早餐係今次

係休息站去TOILET要入錢過閘,真係幾得意,去完攞住張RECEIPT係便利店買野有得REFUND返EURO0.5

坐2個鐘去到天鵝堡,左邊係新天鵝堡,右邊係舊天鵝堡,一落車就已經見到好多遊客,有d人就排隊坐馬車,不過我覺得有馬車既地方都好臭,因為d馬周圍痾,最大鑊都係落山果陣,臭到想嘔.....

領隊講完邊到集合之後,就係木屋仔隔離排隊買巴士飛,等左十幾分鐘有車,上山5分鐘就到,巴士行右邊路上山,馬車就係左邊上落,中途司機都有停一停介紹下d風景,我地梗係唔知佢講乜,影相就算lu,我地係山腰落車,跟住d人上斜路就係吊橋,影天鵝堡真係最正~
我地狂影一輪就落番新天鵝堡,行十分鐘左右就到,中途又見到舊天鵝堡,原來後面仲有個湖,d風景真係好靚~
行到新天鵝堡見到好多遊客等緊入去,領隊話無乜野睇,同埋我地都無時間睇,所以影完相就走,見到有間賣紀念品既舖頭想買個鎖匙扣,不過要成euro6,真係唔捨得,又唔係好特別,買左都係擺者,所以都無買~
落左一半就見到間餐廳,見到門口有Movenpick雪糕櫃,唔記得euro2.5定euro3,隻味好似叫Maple Walnut,都幾好食,係甜左d....

行到落馬車站就開始臭,望落斜路已經見到幾堆馬屎,仲有幾十隻烏蠅嬲住,好似蜜蜂嬲蜜蜂咁, 真係好嘔心,一路掩口鼻,見到有馬屎就快步走,好奇怪D人可以若無其事,仲可以影馬屎相!?

好彩落山都好快,行番去餐廳食飯,又係果堆鹹酸菜,好彩有D薯仔飽肚D,咁啱又團日本人,我地睇過佢地D野食好似好食D,有沙律同扒,真係恨死隔離....

下一站係華多茲Vaduz~列支登士敦的首都,山上有座皇宮,但望落似石屋多D,落車去完TOILET就買左個COIN,我地行最旺果條街,睇下D紀念品同朱古力,最搞笑行左間眼鏡舖,望左一陣,入面個6,7歲男仔竟然用普通話同我講"你好",我都俾佢嚇親,不過我都同佢講番"你好",真係想知佢係邊度學返黎,哈哈~

我地行完成條街先番轉頭買朱古力,果間舖頭竟然開始收舖,果陣先6點咋,我地衝入去買左D瑞士蓮同迷你牛鈴,跟住就坐車返酒店
今晚住Best Western Hotel Rothaus,又係懷舊FEEL,個TOILET好窄呀,轉身唔小心就撞到手踭~

 

放低行李就落去食dinner,餐廳都好懷舊,今餐食得飽飽,領隊話9點集合出去行下水塔橋

我地帶埋腳架出去影相,係酒店行幾分鐘就到湖邊,真係好靚架~仲有d人餵天鵝引佢行上湖邊既樓梯,真係好鬼大隻,又唔驚人,最衰無帶野食出黎,唔係就可以餵佢地食

領隊帶我地過完橋就行去寶齊萊果邊,跟住就解散,自己行番酒店,我記得之前d網友話火車站有間超級市場係開24小時,所以問下領隊,領隊話應該10點收檔,我唔信邪過火車站睇下,點知真係改左收10點呀............真係唔開心,諗住可以行下超級市場買手信,點知無得行,唯有同d火車影下相啦~

我地行番出火車站,有幾個男人係度徘徊,周圍又無乜人,湖邊又黑,我老公好緊張,捉到我隻手好實,又行得快,行到酒店對面先放鬆d咋,不過諗番都有d驚,雖然瑞士d治安都ok,不過d街又無人行又黑,出左事都無人知....