歐洲11天團- Day 4(Part 2)

第4天 茵斯布魯克(奧地利)->慕尼黑(德國)->薩爾斯堡(奧地利)->市內觀光
◆薩爾斯堡Salzburg~著名天才音樂家-莫扎特的家鄉，亦是著名音樂電影"仙
樂飄飄處處聞"取景之美麗城市，此古城更於1997 年被聯合國列為世界文化
遺產。
● 莫扎特故居Mozarts Geburtshaus~莫扎特小時居住的房屋。
◎ 美麗堡花園 Mirabellgarden~一個完全美麗的奧地利式花園。電影"仙樂
飄飄處處聞"亦於此花園拍攝。
●華斯登廣場 Residenzplatz~位於城內的一個大形露天廣場，夏季時常舉行
大形的露天音樂會，更坐立了莫扎特的銅像。

坐左2個幾鐘車終於到薩爾斯堡Salzburg,首先返酒店放低行李,係LOBBY等既時候見到有得上網,實在太開心喇!黎左幾日都無得上網,我已經諗定夜D落黎上網

入到房都好滿意,張床同枕頭都好舒服,真係有D安慰....

6點幾集合出去行舊城區同美麗堡花園,因為係星期日,除左食肆之外,其他舖頭都無開,行左十幾二十分鐘到美麗堡花園,原來唔係好大,我地集中影門口果對石像,話晒係"仙樂飄飄處處聞"出過鏡

影完相就跟領隊入舊城區,我地行到河邊已經嘩嘩聲,個景真係好靚呀,加埋日落同d建築物真係perfect~

行行下就見到黃色呢座莫札特故居,再行入廣場同莫札特銅像影相,中途有間賣莫札特朱古力,不過又無開....

我地差唔多8點先返酒店,過完橋,上完斜路,竟然見到有間士多未閂,我地全團人衝晒入去買生果,朱古力,D生果好新鮮,連紅莓都有,我就買左盒士多啤梨,原本想買D莫札特朱古力做手信,老公話實溶,帶唔到返香港,所以無買到~
估唔到Salzburg都有牛奶妹~

返到酒店放低D野就落餐廳食飯,個湯好似豉油湯加麵包條,個飯幾好食,不過份量少左D,甜品又係蘋果批,仲甜過LUNCH果件,食完返上房又係杯麵時間~

歐洲11天團- Day 4(Part 1)

第4天 茵斯布魯克(奧地利)->慕尼黑(德國)->薩爾斯堡(奧地利)

今朝既早餐都係包,蛋 & cheese....食完又準備出發去Swarovski博物館,坐左半個鐘左右就到,9點幾已經有幾部旅遊巴泊係度,領隊幫我地買飛,我地就周圍影相,領隊派飛果陣話買野用飛可以扣euro2,噴泉右下角就係入口

跟住有個識講廣東話既staff 同我地介紹下,左面果幅係水晶牆,真係好閃呀~

個博物館其實唔係好大,有2層高,出口就係賣水晶同餐廳,領隊話出口個女廁有水晶係入面,不過我無去到,所以睇唔到,幫人買左2個水晶,退埋稅先平香港少少,我都係買左2支水晶原子筆同一對耳環,俾完錢攞番張退稅單,走果陣搞退稅

坐左2個零鐘就到下一站係慕尼黑1972 年奧林匹克會場,因為係WEEKEND好多人係公園做運動,主要係去廁所,買杯雪糕行個圈就走喇~

跟住去食正宗德國豬手&啤酒,我地落車行入瑪麗恩廣場(Marienplatz),行行下見到有架車仔賣國旗既紀念品幾得意就影張相,點知個檔主竟然大嗌"No money,no picture",我地扮唔識聽就行左去,估唔到D人咁現實....

去到餐廳坐低等食,又係去左TOILET先,去完見到有個阿姐坐係門口,原來係等TIPS,不過無帶錢係身無俾到,其他遲去D團友就帶定幾亳EURO俾TIPS,全團人得我同領隊飲可樂,因為我知我實飲唔晒,要試啤酒試老公果杯都得啦~
試左啖真係好香麥味,個番茄湯都好飲

,
到主角豬手出場,個皮炸到好脆,但入面D肉有D似湯渣,以為果D菜絲係椰菜絲,點知食落好似咸酸菜咁,以為黃色個波波係薯茸,點知食落好似糯米咁,舊豬手我都食唔晒,因為都幾漏下~
甜品係勁甜蘋果批,食左2啖無食,跟住又落番廣場行下,又買左杯甜筒食,想行下D舖頭都唔得,除左食肆外,全部都無開,係廣場等埋D團友就行番去上車,準備出發去Salzburg!

歐洲11天團- Day 3

第3天 威尼斯(意大利)->市內觀光->茵斯布魯克(奧地利)

今朝都係8點半morning call,早餐都係火腿,牛角包,炒蛋,食完就集合上車去威尼斯碼頭上船入舊城

坐左十零分鐘就見到威尼斯既地標鐘樓,第一個感覺係威尼斯人真係抄得好似喎!
不過真既就殘d~
落船之後跟住領隊行去聖馬可廣場,途中經過嘆息橋,不過都係俾廣告板圍住

聽完領隊介紹完就係廣場解散,我地只係得2個鐘自由時間咋~
我地係右面拱門行入去,入面全部都係橫街窄巷,好難認路,我地又周圍行,不過好在領隊話跟住"Piazza San Marco"個牌就行番廣場,所以都好易行返出去~

領隊話無免費toilet,叫我地幫襯下coffee shop順便借toilet,我地行番去LV果邊既名店街,行行下見到Burger King,順便去埋toilet,又乾淨又唔駛錢,原本諗住係Burger King隔離買番件pizza食下,點知等左成5分鐘,個staff 仲幫緊前面個2個意大利人睇下食乜好,等到唔耐煩就閃左

行到番去碼頭啱啱好2個鐘,等齊團友就上船,威尼斯好多地方都未行到,有機會一定會再黎過!
落左船就去新城度食lunch,同舊城差好遠,人影都唔多個,舖頭又無開,我地去左間日本料理食中餐,食完出去行下,點知lunch hour去到4點.....
上車又開始長途車,坐左4個幾鐘去奧地利,因為係WEEKEND,沿途好多人一家大細開車去郊遊,真係好寫意,不過搞到好塞車.....

去到Innsbruck既餐廳門口都見到雪山,成團人係度影相,影左一輪先入去食飯,今餐又係中餐,不過黎左幾歐洲,中餐真係有保證d,起碼唔會難食,就算一碟唔啱食,六,七個餸梗有野啱食,西餐就一人一湯,主菜同甜品,一黎份量細,二黎唔啱食就無喇~

今餐終於記得影相~

Innsbruck要睇既景點就係黃金屋頂,唔記得自由時間係半個鐘定9個字,淨係記得跑黎跑去影相,d building真係幾靚,好多都雕晒花,而且好colourful~
仲見到swarovski專門店,不過weekend無開....
上車番酒店既時候,領隊話聽朝又有d時間,問我地自唔自費去swarovski博物館,其他團友都係話無所謂,所以聽朝自費EUR10 swarovski博物館

攞埋房都係8點幾,同老公係酒店附近行下,連酒店都望到雪山架~
原本想行番去黃金屋頂果頭,但係領隊話要行20分鐘,又開始天黑,所以都係放棄左
行左十幾分鐘條街一個人都無,我地直頭行出馬路影,原本想再行遠d,不過老公驚危險,所以都係番酒店,順便清杯麵
今晚間酒店叫HOTEL ALPINPARK,個枕頭太扁,搞到我訓得唔舒服,無冷氣都唔緊要,但係隔離間教堂每隔十五分鐘響一次,響到十一點左右先停,因為我地住2樓,樓下D人傾偈都聽得好清楚,不過我地都算夜訓,所以都訓得著既~

又買床單!?

前2日去sogo見到鬆弛熊床單特價,雙人床單,枕袋同被袋加埋$400,真係好靚呀,老公竟然話買啦買啦,因為佢有禮券麻,尋晚行吉之島雙人床單,枕袋,冷氣被同被袋要$599,咁sogo都算平,但係上個禮拜先係casablanca買左套Classic Pooh既雙人床單,枕袋,冷氣被同被袋,雖然330針,不過都係$260咋,依家鬆弛熊床單雙人床單,枕袋同被袋無冷氣被都要$400,好似真係貴左d,同埋已經有4套床單連被袋,咁仲買唔買好呢??