終於訂左姊妹裙~

之前同事係廣州買左幾條姊妹裙都係RMB100一條,所以問同事攞卡片係QQ 訂裙,因為係訂做,所以要RMB120一條,14號上廣州攞,好期待我既廣州shopping之旅, 己經訂左天一酒店,仲未買直通巴士飛,買埋d利是封同貼紙就可以派帖喇~

收到淘寶幅油畫喇!

前日上淘寶check下幅油畫寄左未,點知原來已經寄左出黎,第二日己經有速遞打黎話今日會送貨,外表包左層紙皮,入面有拍拍紙包好,不過個面都幾污遭下,抹左2次都仲有少少漬~

拆完之後發覺個頂撞過黎,仲黏番好,不過算啦,百零蚊仲想點丫,係個頂都唔算好覺既~

終於印帖喇!

上個禮拜去聚德軒交相做簽名布,女經理問我地印左帖未,我地話未,佢就話"吓,仲未印呀,快d印喇喎"跟住就俾張form我地過灣仔揀帖,間野叫金成,係去會展條天橋附近,入到去有pair人揀緊款，佢地俾左一叠帖俾我地揀，我地揀左深啡色＋桃紅色字的帖，因為我覺得好sharp,男友就話鍾意對公仔！？

揀好款之後，有個姐姐幫我地填form,好快就搞掂個初稿,尋晚再返去對稿,打錯一個字,即場改完之後就可以正式印,2個禮拜就印好~

因為酒樓淨係包一圍８張帖，我地諗住再加100張，金成話$4.5一張,我地最尾都係講到$4.2一張,都好啦,唔駛再煩帖既野

行去銅鑼灣果陣經過e-print,順便問下整邀請咭既價錢同攞d小册子,個姐姐好詳細咁解釋點計點整,仲話今日俾稿佢,聽日有得攞,嘩,咁又幾快喎~

我仲諗緊去印館定係e-print印,e-print好似呢排既comment麻麻地~

不過等我再學下photoshop先揀把啦

有感而發....

仲有2個幾月就結婚,但係好多野都未搞,CHECKLIST仲有好多PENDING未做,男朋友又踢一踢,郁一郁,之前為左D小事喊左2日,可能壓力太大卦,教會D人個個禮拜見到我第一句就問間屋搞掂未,婚禮搞成點,我D佢地係關心我,但我已經覺得好煩,可唔可以等我靜靜搞呢??我唔想同其他人交代咁多野

呢排搞訂姊妹裙,揀左米白色+香檳色,某姊妹問披肩可唔可以用紫色,佢話白色披肩唔靚喎,我話好,不過影團體相用番白色披肩,我真係未見過姊妹用既披肩同條裙係唔同色羅.......估唔到披肩咁小事都要我咁傷神.......點解姊妹唔係關心我大日子果日要做乜野,要幫手D乜野,而係關心自己既造型呢???

另一個姊妹問我幾時搞兄弟姊妹MEETING,我話帖都未印點開,佢話未印帖唔開得架咩?我想開MEETING既時候係可以派帖,派RUNDOWN,傾分工,唔通CALL晒D人出黎見下面,吹下水咩,我仲有大把野未做架........

得2個姊妹會問我有乜要幫手,要幫手就出聲,我話事就OK, 我覺得唔幫手唔緊要,但唔好俾我煩多D野羅,壓力已經爆左次,我唔想又爆多次羅,當就下我一次咁多得唔得呢???

酒店出門套房

今日得閒search下酒店出門既價錢,目標係尖沙咀區or 旺角區,帝京套房要成三千幾蚊,太貴喇,
帝苑個價錢都ok, HK2300+10%,睇埋我心水都會海逸….點解咁平既?!
12月尾高級套房都係千五蚊左右咋喎~

佢有2隻PLAN, 一隻係:住宿优惠计划

免费使用室外游泳池、桑拿浴室、健身室及恒温水力按摩浴池

HK1550+10%SERVICE
CHARGE

另外一隻係「甜蜜蜜」蜜月住宿套餐

免费双人自助早餐, 奉送精选红酒及心型朱古力

免费使用室外游泳池、桑拿浴室、健身室及恒温水力按摩浴池

HK1488包SERVICE
CHARGE

 

問完男友意見,決定用VISA HOLD左「甜蜜蜜」蜜月住宿套餐 ,橫掂可以48小時取消BOOKING,不過我諗都好難搵到咁抵………..

 

唔知結婚前果晚可唔可以浸下按摩池呢?第二朝可以食埋自助早餐都好喇,呵呵

訂左拉米娜油畫

終於都係淘寶訂左拉米娜喇,24寸都係70蚊人民幣,加埋運費,VISA手續費都係90蚊人民幣,十日就有貨睇,好期待,不過成4KG咁重,唔知我拎唔拎得掂呢.......